स्थानिक स्वराज्य संस्थांच्या निवडणुकांचा धुराळा उडत असतानाच पुण्याच्या राजकारणात एका मोठ्या भूकंप होण्याची शक्यता निर्माण झाली आहे. उपमुख्यमंत्री अजित पवार यांच्या गटातील आक्रमक नेत्या रूपाली ठोंबरे पाटील लवकरच शिवसेना शिंदे गटात प्रवेश करण्याच्या तय
.
मिळालेल्या माहितीनुसार, गेल्या काही दिवसांपासून अजित पवार यांच्या राष्ट्रवादी काँग्रेसमध्ये अस्वस्थ असलेल्या रूपाली ठोंबरे पाटील यांनी खासदार श्रीकांत शिंदे यांची भेट घेतली. विशेष म्हणजे, या भेटीदरम्यान त्यांच्यासोबत काँग्रेसच्या नेत्या संगीता तिवारी आणि शिंदे गटाच्या नेत्या शर्मिष्ठा येवले यादेखील उपस्थित होत्या. ऐन निवडणुकीच्या तोंडावर पुण्यातील या फायरब्रँड नेत्या शिंदे गटाच्या संपर्कात आल्याने अजित पवार गटासाठी हा मोठा धक्का मानला जात आहे.
नेमके काय म्हणाल्या रूपाली ठोंबरे?
या भेटीनंतर प्रसारमाध्यमांशी बोलताना रूपाली ठोंबरे यांनी पक्षांतराचे संकेत दिले आहेत. त्या म्हणाल्या, “कोणत्या पक्षात काम करायचे आणि कोणता नेता आपल्याला पाठिंबा देतोय, हे पाहण्याचा अधिकार कार्यकर्त्याला आहे. माझे प्रवक्तेपद गेले म्हणून मी काम करणे थांबवलेले नाही. जर शिंदे साहेबांच्या शिवसेनेकडून काम करणाऱ्या कार्यकर्त्याला चांगली ऑफर मिळाली, महिलांचा आणि कार्यकर्त्यांचा सन्मान होत असेल, तर मी नक्कीच विचार करेन.”
रूपाली ठोंबरेंच्या नाराजीचे कारण काय?
रूपाली पाटील यांनी फलटण उपजिल्हा रुग्णालयातील महिला डॉक्टरच्या आत्महत्या प्रकरणात अत्यंत आक्रमक भूमिका घेतली होती. या प्रकरणी त्यांनी थेट राज्य महिला आयोगाच्या अध्यक्ष रूपाली चाकणकर यांच्यावर मृत महिला डॉक्टरचे चारित्र्यहनन करण्याचे आरोप केले होते. चाकणकर या राष्ट्रवादीच्याच नेत्या आहेत. यामुळे रूपाली पाटील यांच्या आरोपांमुळे एकप्रकारे राष्ट्रवादीचीच गोची झाली होती. त्यामुळे पक्षाने रूपाली पाटील यांना कारणे दाखवा नोटीस बजावली होती. या नोटीशीला पाटील यांनी कायदेशीर उत्तर देण्याचे सूतोवाच केले होते. पण त्यांचे उत्तर मिळण्यापूर्वीच पक्षाने त्यांची प्रवक्तेपदावरून हकालपट्टी केली. तेव्हापासून त्या पक्षात नाराज होत्या. आता ही नाराजी त्यांना शिंदे गटाच्या उंबरठ्यावर घेऊन आल्याचे बोलले जात आहे.
मनसेतून राष्ट्रवादीत, आता शिंदेसेनेत?
दरम्यान, रूपाली ठोंबरे पाटील यांचा पुण्यात चांगला जनसंपर्क आहे. मनसेतून राष्ट्रवादीत आल्यानंतर त्यांनी आक्रमकपणे पक्षाची बाजू मांडली होती. आता जर त्यांनी शिंदे गटात प्रवेश केला, तर पुण्यात शिंदेंची ताकद वाढेलच, पण ऐन निवडणुकीत अजित पवारांना मोठे खिंडार पडण्याची शक्यता नाकारता येत नाही.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
