रणवीर सिंगचा ‘धुरंधर’ प्रदर्शनापूर्वीच वादात: शहीद मेजर मोहित शर्मा यांच्या पालकांनी दिल्ली उच्च न्यायालयात चित्रपटावर बंदी घालण्याची मागणी केली

अभिनेता रणवीर सिंगचा ‘धुरंधर’ चित्रपट प्रदर्शनापूर्वीच वादात सापडताना दिसत आहे. अशोक चक्र आणि सेना पदक विजेते शहीद मेजर मोहित शर्मा यांच्या पालकांनी ‘धुरंधर’च्या प्रदर्शनावर तात्काळ बंदी घालण्याची मागणी करत दिल्ली उच्च न्यायालयात याचिका दाखल केली आहे.

बार अँड बेंचच्या एका अहवालानुसार, त्यांच्या याचिकेत कुटुंबाने आरोप केला आहे की, चित्रपटात भारतीय सेना किंवा मेजर शर्मा यांच्या कायदेशीर वारसांची परवानगी न घेताच स्पेशल फोर्स ऑफिसरचे जीवन, गुप्त ऑपरेशन्स आणि हौतात्म्य थेटपणे दाखवण्यात आले आहे.

चित्रपटात रणवीर सिंगचे पात्र शहीद मेजर मोहित शर्मा यांच्यापासून प्रेरित असल्याचे सांगितले जात आहे.

कुटुंबाचा युक्तिवाद आहे की, जरी मीडिया रिपोर्ट्स आणि ऑनलाइन चर्चांनी ‘धुरंधर’ला मेजर शर्मा यांच्या कथेसोबत जोडले असले तरी, चित्रपट निर्मात्यांनी ना अशी प्रेरणा स्वीकारली आहे, ना कोणत्याही टप्प्यावर कुटुंबाशी सल्लामसलत केली आहे.

याचिकेत म्हटले आहे की, शहीद ‘कोणतीही व्यावसायिक वस्तू नाही.’ आणि असेही म्हटले आहे की, कोणालाही आपल्या फायद्यासाठी परवानगीशिवाय सत्य, प्रतिष्ठा आणि सैनिकाचे जीवन बदलण्याचा अधिकार नाही.

कुटुंबाने पुढे म्हटले की, अनधिकृत चित्रण संविधानाच्या अनुच्छेद 21 अंतर्गत शहीदाच्या मरणोत्तर व्यक्तिमत्त्वाच्या अधिकारांचे उल्लंघन करते, तसेच, कुटुंबाच्या गोपनीयतेच्या आणि प्रतिष्ठेच्या अधिकाराचेही उल्लंघन करते.

याचिकेमध्ये माहिती आणि प्रसारण मंत्रालय, सेंट्रल बोर्ड ऑफ फिल्म सर्टिफिकेशन (CBFC), भारतीय लष्कर आणि चित्रपटाचे दिग्दर्शक व निर्माते यांना प्रतिवादी बनवण्यात आले आहे.

याचिकाकर्त्यांनी न्यायालयाला विनंती केली आहे की, चित्रपटाच्या प्रदर्शनावर बंदी घालावी आणि कोणत्याही सार्वजनिक प्रीमियरपूर्वी मेजर शर्मा यांच्या कुटुंबासाठी खासगी स्क्रीनिंग अनिवार्य करावी.

कुटुंबाने एक घोषणापत्र देखील मागितले आहे की, भविष्यात खऱ्या लष्करी शहीदांवर आधारित चित्रपटांना लष्कर आणि शहीद यांच्या कायदेशीर वारसांकडून दोघांकडूनही पूर्वपरवानगी घ्यावी लागेल.

धुरंधरबद्दल बोलायचं झाल्यास, हा चित्रपट 5 डिसेंबर रोजी प्रदर्शित होणार आहे. हा चित्रपट ‘उरी’ फेम दिग्दर्शक आदित्य धर यांनी लिहिला आणि दिग्दर्शित केला आहे. चित्रपटात रणवीर सिंग व्यतिरिक्त, अर्जुन रामपाल, संजय दत्त, अक्षय खन्ना, आर माधवन दिसणार आहेत.

माधवन चित्रपटात भारताचे राष्ट्रीय सुरक्षा सल्लागार अजित डोवाल यांची भूमिका साकारत आहेत. तर, चित्रपटात रणवीरच्या विरुद्ध त्यांच्यापेक्षा 20 वर्षांनी लहान अभिनेत्री सारा अर्जुन दिसणार आहे.