सरसंघचालकांच्या हस्ते संघ प्रार्थना ध्वनीफितीचे विमोचन: सांगीतिक प्रार्थनेमुळे नवीन लोक संघाकडे आकर्षित होतील – मोहन भागवत – Nagpur News

.

पुण्यातील शिवाजी नगर मतदारसंघाचे आमदार सिद्धार्थ शिरोळे आणि चितळे समूहाचे संचालक इंद्रनील चितळे यांची निर्मिती असलेल्या “अर्थासहीत संघ प्रार्थना’ या ध्वनीफितीचे विमोचन सरसंघचाकांच्या हस्ते करण्यात आले. त्यावेळी ते बोलत होते. रेशिमबागेतील महर्षि व्यास सभागृहात आयोजित कार्यक्रमाला ध्वनीफितीशी संबंधित सर्व जण उपस्थित होते.

शब्द, अर्थ आणि भाव या तिन्हीला अनुरूप संगीत असा योग या निमित्ताने जुळून आला आहे. प्रार्थना म्हणण्याने ती कानातून बुद्धीत आणि बुद्धीतून मनात जाते. पण, संगीतामुळे प्रार्थना कानातून सरळ मनात उतरते. म्हणून गीते परिणामकारक असतात असे सरसंघचालक म्हणाले. पहिल्या टप्प्यात हिंदी, मराठी, गुजराथी, इंग्रजी, तमीळ, तेलुगु, कन्नड व मल्याळम या भाषांमध्ये प्रार्थनेच्या अर्थाचे निवेदन केले आहे. संगीतकार राहुल रानडे यांनी संगीत दिले असून ख्यातनाम गायन शंकर महादेवन यांनी गायन केले आहे. मराठी अर्थ विवेक आपटे यांनी लिहिला असून निवेदन अभिनेता सचिन खेडेकर यांचे आहे. हिंदीत हरिश भीमानी यांनी आवाज दिला आहे.

यावेळी बोलताना सरसंघचालक मोहन भागवत यांनी संघाची प्रार्थना हा सामुहिक संकल्प असल्याचे सांगितले. स्वयंसेवक रोज त्याची आठवण करतात. सगळे मिळून काय करायचे ठरवले आहे ते प्रार्थनेत आहे. भारत मातेला काहीही मागायचे नाही. तर तिच्याकरता द्यायचे आहे. मागायचे आहे ते परमेश्वराकडे मागितले आहे. १९३९ पासून आजपर्यंत स्वयंसेवक रोज संघ प्रार्थनेचे उच्चारण करतात. इतक्या वर्षाच्या साधनेतून प्रार्थनेला मंत्राचे सामर्थ्य लाभलेले आहे. त्यातून स्वयंसेवक पक्का होतो.

शब्द आणि अर्थाच्या पलिकडे जावून प्रार्थना हा भाव आहे. सुरूवातीला मराठी, हिंदीत प्रार्थना होती. संपूर्ण भारतात चालणारी भाषा संस्कृत होती. म्हणून संस्कृतमध्ये केली. संकल्पाची दृढता, मातृभूमीप्रती भक्ती, प्रेम आणि समर्पण प्रार्थनेत आहे. शब्दातून अर्थाकडे आणि अर्थातून भावाकडे प्रवाह व्हावा लागतो. संघाचा हा प्रवाह संघाच्या गतीने सुरू आहे. काहींना तो संथही वाटु शकतो. कारण सायकल सायकलच्या गतीने जाणार आहे.