कळमनुरी तालुक्यामध्ये महसूल प्रशासनाच्या वतीने 306 घरकुल लाभार्थ्यांना सोमवारी ता. २ एकूण पाच ब्रास वाळू वाहतुकीचे मोफत पास देण्यात आले आहे. त्यामुळे आता या लाभार्थ्यांच्या घरकुलाची बांधकाम मार्गी लागणार आहे.
.
कळमनुरी तालुक्यामध्ये जिल्हा ग्रामीण विकास अंतर्गत राबविण्यात येणाऱ्या घरकुल योजनेमध्ये लाभार्थ्यांची निवड करण्यात आली आहे. मात्र अनेक ठिकाणी घरकुल बांधकामासाठी वाळू न मिळाल्यामुळे लाभार्थ्यांचे घरकुलाचे काम रखडले होते. त्यातच घरकुलासाठी मिळणारी तुटपूंजी रक्कम लक्षात घेता लाभार्थ्यांना वाळू खरेदी करणे कठीण झाले होते. वाळू अभावी घरकुलाचे बांधकाम कसे पूर्ण करावे असा प्रश्न लाभार्थ्यांसमोर उभा राहिला होता.
दरम्यान शासनाने घरकुल लाभार्थ्यांना पाच ब्रास वाळू मोफत देण्याचा निर्णय घेतला आहे. त्यानुसार राज्यातील सर्व जिल्हाधिकारी कार्यालयांना आवश्यक सूचना देण्यात आल्या आहेत. यामध्ये तालुकास्तरावरून घरकुल लाभार्थ्यांना वाळू वाहतुकीचे पास देण्याच्या सूचनाही शासन स्तरावरून देण्यात आल्या. त्यानुसार जिल्हाधिकारी राहुल गुप्ता यांनी उपविभागीय अधिकारी व तहसीलदारांची बैठक घेऊन त्यांना वाळू वाहतुकी बाबतच्या सूचना दिल्या होत्या.
त्यानुसार आज कळमनुरी येथे उपविभागीय अधिकारी कार्यालयात उपविभागीय अधिकारी प्रतीक्षा भूते यांच्या हस्ते 306 लाभार्थ्यांना वाळू वाहतुकीचे पास देण्यात आले आहेत. यावेळी तहसीलदार जीवक कुमार कांबळे, बालाप्रसाद धूत, अव्वल कारकून माधव वाडीकर यांच्यासह कर्मचाऱ्यांची उपस्थिती होती.
दरम्यान वाळू वाहतुकीच्या पास मिळाल्यामुळे लाभार्थ्यांच्या चेहऱ्यावर समाधानाचे भाव दिसू लागले होते. आता वाळू उपलब्ध झाल्यामुळे घरकुलाचे बांधकाम गतीने पूर्ण करणे शक्य होणार असल्याचे लाभार्थ्यांनी सांगितले.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
