सेनगाव तालुक्यातील पुसेगाव शिवारात एका हॉटेलच्या बाजूला सुरु असलेल्या जुगार अड्ड्यावर पोलिस अधिक्षकांच्या विशेष पथकाने छापा टाकला. यामध्ये 8 जणांना ताब्यात घेण्यात आले असून या प्रकरणी नर्सी पोलिस ठाण्यात गुरुवारी ता. 7 रात्री उशीरा गुन्हा दाखल झाला आ
.
हिंगोली जिल्ह्यात अवैध व्यवसायाचे उच्चाटन करण्यासाठी पोलिस अधीक्षक श्रीकृष्ण कोकाटे, अप्पर पोलिस अधीक्षक कमलेश मीना, गुन्हे शाखेचे निरीक्षक मोहन भोसले यांनी विशेष पथके स्थापन केली आहेत. यामध्ये स्थानिक पोलिस ठाण्यातील अधिकारी व कर्मचाऱ्यांसोबत पोलिस अधीक्षकांनी नियुक्त केलेल्या दोन पथकाचाही समावेश आहे. या पथकाकडून मागील काही दिवसांपासून अवैध व्यवसायाची माहिती घेऊन कारवाई केली जात आहे.
दरम्यान, सेनगाव तालुक्यातील पुसेगाव शिवारातील एका हॉटेलच्या बाजुला असलेल्या मोकळ्या जागेत काही जण तिर्रट नावाचा जुगार खेळत असल्याची माहिती विशेष पथकाला मिळाली होती. त्यावरून विशेष पथकातील कर्मचारी तसेच नर्सी पोलिसांच्या पथकाने गुरुवारी रात्री छापा टाकला. यामध्ये आठ जण तिर्रट जुगार खेळत असल्याचे आढळून आले. पोलिसांना पाहताच काही जणांना पळून जाण्याचा प्रयत्न केला. मात्र सर्वच बाजूंनी पोलिसांनी त्यांची कोंडी केल्याने कोणालाही पळ काढता आला नाही.
पोलिसांनी घटनास्थळावरून जुगाराचे साहित्य व सुमारे पाच हजार रुपये रोख जप्त केला आहेत. या प्रकरणी जमादार गणेश नरोटे यांच्या तक्रारीवरून गोविंद कापसे, माणिक रोडगे, शिवाजी जोगदंड, सिताराम कांबळे, वैजनाथ रोडगे, ज्ञानेश्‍वर गवळी, सय्यद शौकत, शिवाजी जुंबडे यांच्या विरुध्द गुन्हा दाखल करून त्यांना ताब्यात घेतले आहे. जमादार व्ही. बी. कुटे पुढील तपास करीत आहेत.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
