Palghar Gujarati Name Boards Controversy: मुंबई-अहमदाबाद महामार्गावरील पालघर जिल्ह्याच्या हद्दीतील हॉटेलांवर लावलेल्या गुजरात पाट्यासंदर्भात मनसे आक्रमक झाली आहे. पालघर मनसे पदाधिकाऱ्यांनी मुंबई-अहमदाबाद राष्ट्रीय महामार्गावरील हालोली येथील हॉटेलच्या गुजराती पाट्यांची मनसे कार्यकर्त्यांनी तोडफोड केली आहे. पालघरमध्ये लावलेल्या पाट्या मनसेने काढून टाकल्या आहे.
मुंबई अहमदाबाद महमार्गावरील पालघर जिल्ह्याच्या हद्दीतील घोडबंदर ते अच्छाडपर्यंत बहुंताश हॉटेलांच्या पाट्या गुजराती भाषेत असल्यामुळं महमार्गावरुन पालघर जिल्ह्यात प्रवेश करताना या पाट्या दिसत होत्या. या पाट्यांविरोधात पहिल्यांदा झी 24 तासने आवाज उठवला होता. त्यानंतर पालघर जिल्ह्यातील मनसे कार्यकर्त्यांनी आंदोलन करत या हॉटेलच्या पाट्यांची तोडफोड केली आहे.
मनसे आक्रमक झाल्यानंतर काही हॉटेलच्या मालकांनी गुजराती पाट्या उतवण्यात आल्या आहेत. घोडबंदर ते अच्छाडपर्यंतच्या हॉटेलमध्ये इंग्रजीत पाट्या आहेत त्याचबरोबर इंग्रजीत पाट्या आहेत. मात्र कुठेही मराठीत पाटी नसल्याने आपण नेमके महाराष्ट्रात आहोत की गुजरातमध्ये असा प्रश्न निर्माण होत होता. मात्र आता या पाट्याविरोधात मनसेने आक्रमक भूमिका घेतली असून काही ठिकाणी पाट्यांची तोडफोड करण्यात आली आहे. तर काही हॉटेलला थेट इशारा देण्यात आला आहे.
दरम्यान, मुंबई अहमदाबाद महामार्गावर असणाऱ्या या गुजराती पाट्यांसंदर्भात मनसे नेते अविनाश जाधव यांनीसुद्धा झी 24तासशी संवाद साधताना आपली भूमिका स्पष्ट केली. एकीकडे मराठी पाट्यांची सक्ती होत असतानाच या दुकानांकडे होणाऱ्या दुर्लक्षाविषयी प्रश्न विचारला असता, ‘मी खात्रीनं सांगतो, राज ठाकरेंच्या भाषणामध्ये हे आलं होतं की पालघर ते मुंबई या परिसरामध्ये गुजरातमध्ये येणाऱ्या गाड्या, व्यापारी, दुकानदार यांनी सर्रास जागा खरेदी केल्या आहेत. जवळजवळ ते गुजरातमध्येच आहेत असं भासवण्याचा प्रयत्न त्यांच्याकडून मागील कैक वर्षांपासून होत आहे. आपल्याकडे कायदे आहेत, पाट्यांसाठीचे कायदे आहेत, दंड आहे मात्र अधिकारी याकडे का लक्ष देत नाहीत?’ असा उद्विग्न प्रश्न त्यांनी उपस्थित केला.
नवी मुंबईत तरुणाला मारहाण
राज्यात सध्या मराठी – अमराठीचा मुद्दा गाजत आहे. मराठी न बोलण्यावरून ठिकठिकाणी वादाचे, हाणामारीचे प्रकार घडत आहेत. त्यातच मराठी – अमराठीच्या वादाचे लोण महाविद्यालयांपर्यंत देखील पसरले आहे. त्यातून एका मराठी विद्यार्थ्याला जबर मारहाण झाली आहे. वाशीतील महाविद्यालयातील विद्यार्थ्यांमध्ये हा वाद झाला. विद्यार्थ्यांच्या व्हाट्सअप ग्रुपमध्ये चॅटिंगदरम्यान मराठी – अमराठीचा वाद उद्भवला होता. त्यातून सूरज पवार (२०) व फैजान नाईक (२०) यांच्यात शाब्दिक वाद झाला होता. त्यातून सोमवारी दुपारी महाविद्यालयाच्या गेटवरच दोघांमध्ये हाणामारी झाली. यामध्ये फैजान व त्याच्या तीन साथीदारांनी सूरजला लाथा बुक्यांसह हॉकीने मारहाण केली. याप्रकरणी वाशी पोलिस ठाण्यात गुन्हा दाखल करण्यात आला असून पोलिस अधिक तपास करत आहेत. या प्रकरणात मनसेने देखील उडी घेतली असून वाशी पोलीस ठाण्यात आज भेट देणार आहेत.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
