अजित पवार गटात असंतोष: माजी आमदार राजन पाटील फडणवीसांना भेटले; म्हणाले- जिथे शिस्तच उरली नाही तिथे निष्ठेला फार महत्त्व वाटत नाही – Solapur News

.

राजन पाटील यांनी माध्यमांशी बोलताना सांगितले की, अजित पवार हे अत्यंत शिस्तप्रिय आहेत आणि त्यांच्यातील शिस्त पाहूनच आम्ही राष्ट्रवादीत प्रवेश केला होता. मात्र, गेल्या काही दिवसांपासून पक्षात बेशिस्तपणा वाढला आहे. जिथे शिस्तच उरली नाही तिथे निष्ठेला फार महत्त्व मला वाटत नाही, असे स्पष्ट मत त्यांनी व्यक्त केले.

यशवंत माने निष्ठावंत सोबत येतील

राष्ट्रवादीत निष्ठेला किंमत उरली नसल्याची खंत व्यक्त करत, भाजपमध्ये मात्र निष्ठेला किंमत असल्याचे राजन पाटील म्हणाले. या कारणामुळेच त्यांनी भाजपमध्ये जाण्याचा निर्णय घेतला आहे. मुख्यमंत्री देवेंद्र फडणवीस यांच्या भेटीनंतर ते पहिल्यांदाच माध्यमांसमोर आले आणि त्यांनी भाजप प्रवेशाचे स्पष्ट संकेत दिले. पक्ष प्रवेशाच्या मुहूर्ताबाबत विचारले असता, त्यांनी मिश्कीलपणे उत्तर दिले की, मुहूर्त शोधायला ते काय लग्न आहे का? राजन पाटील यांनी अजित पवार गटातील कारभारावर नाराजी व्यक्त केली. तसेच, त्यांनी जिल्हाध्यक्ष उमेश पाटील यांच्यावर ‘मी छोट्या माणसाबद्दल बोलत नाही’ अशा शब्दांत खोचक टीका केली. माजी आमदार यशवंत माने हे निष्ठावंत असल्याने ते आपल्या निर्णयाशी सहमत असून तेही सोबत येतील, असा विश्वास त्यांनी व्यक्त केला.

उमेश पाटलांनी दिले आव्हान

उमेश पाटील म्हणाले की, राजन पाटील हे अजित पवार गटाचे माजी आमदार तसेच राज्यमंत्री दर्जा असलेले सहकार परिषदेचे विद्यमान अध्यक्ष आहेत. माझं राजन पाटलांना आव्हान आहे की माझ्या विरोधात लढा. माझा बाप कुठला आमदार, खासदार, मंत्री नाही किंवा माझ्याकडे कारखाना, भरपूर पैसा नाही पण आमच्यात हिंमत आहे. पर्मनंट आमदार म्हणून तुम्ही म्हणवता मग हिम्मत असेल तर माझ्या विरोधात लढून दाखवा. जर माझा पराभव झाला तर मी माझे राजकारण सोडून देतो. मोहोळ तालुक्याला स्वातंत्र्य करण्यासाठी, दहशत मुक्त करण्यासाठी आम्ही लढत होतो. आम्हाला शहीद होण्याची भीती नाही.