Nagpur Crime News: नागपूरात एक धक्कादायक घटना उघडकीस आली आहे. बलात्कार, ब्लॅकमेलिंग आणि पत्नीचा छळ केल्याचा आरोप एका व्यक्तीवर करण्यात आला आहे. धक्कादायक म्हणजे पत्नीनेच पतीचे कारनामे उघडकीस आणून त्याला तुरुंगात पाठवले आहे. पत्नीच्या आरोपानुसार, आरोपी पती दुसऱ्या महिलांशी जवळीक साधून त्याना ब्लॅकमेल करायचा आणि त्यांच्यावर बलात्कार करायचा. अश्लील व्हिडिओ व्हायरल करण्याची धमकी देऊन त्यांच्याकडून पैसे उकळायचा. त्याचबरोबर त्याच्या पत्नीचाही छळ करायचा.
आरोपीचे नाव अब्दुल शारिक कुरैशी असं असून तो नागपुरात पानाच्या ठेल्यावर काम करतो. शारिक सातत्याने त्याच्या पत्नीला मारहाण करायचा. तसंच, तिच्यासोबत बळजबरी अनैतिक संबंध ठेवण्याचा प्रयत्न करायचा. त्याचबरोबर इतर महिलांना प्रेमाच्या जाळ्यात ओढून त्यांच्यावर बलात्कार करायचा. महिलांशी खोटं बोलून तो त्यांचा फायदा घ्यायचा. 24 वर्षांच्या पीडित महिलेला तिच्या पतीवर संशय येऊ लागला. तेव्हा तिने एका नातेवाईकाच्या मदतीने त्याचा फोन क्लोन केला आणि व्हॉट्सअॅप हॅक केलं.
पत्नीने जेव्हा पतीचे व्हॉट्सअॅप तपासले तेव्हा त्याच्या पायाखालची जमिनच हादरली. आरोपीचे अनेक महिलांसोबत संबंध होते त्यात काही अल्पवयीन महिलांचादेखील समावेश होता. आरोपीने त्यांचे अश्लील व्हिडिओ आणि फोटो काढले होते. त्या माध्यमातून तो त्यांना ब्लॅकमेल करुन पैसे मागायचा. एका वरिष्ठ पोलिस अधिकाऱ्यांनी दिलेल्या माहितीनुसार, पीडित महिलेने तिच्या पतीने ज्या महिलांची फसवणूक केली त्यांच्याशी बोलून त्यांना तक्रार करण्यास सांगितली.
पत्नीने हिंमत दाखवल्यानंतर एका 19 वर्षांच्या पीडित तरुणीने समोर येऊन आरोपी अब्दुल शारिक कुरैशी यांच्याविरोधात तक्रार दाखल केली. तिने तक्रारीत म्हटलं होतं की, आरोपीने त्याचे नाव साहिल शर्मा असं आहे. तसंच, माझं लग्न झालं असून मला एक मुलगा देखील आहे. मात्र मी लग्न मोडणार असून तुझ्याशीच लग्न करेन असं अश्वासन दिलं होतं.
पोलिसांनी दिलेल्या माहितीनुसार, पीडित मुलगी खूप घाबरलेली होती. तिला आमच्या पथकाने तक्रार करण्यास तयार केले. आरोपीने तिची सोन्याची अंगठी विकून पैसे घेतले होते. आरोपीच्या पत्नीने पीडितेला पोलिसांसमोर आणले आणि म्हटलं की, तिचा पती एकावेळेला चार ते पाच महिलांशी बोलत होता. आरोपी विरोधात गुन्हा दाखल करुन त्याला अटक करण्यात आली आहे.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
