मुंबई5 तासांपूर्वी
- कॉपी लिंक
लोकप्रिय मराठी अभिनेत्री प्रार्थना बेहेरे हिच्यावर दुःखाचा डोंगर कोसळला आहे. एका रस्ते अपघातात तिच्या वडिलांचे दुःखद निधन झाले आहे. वयाच्या 75 व्या वर्षी त्यांनी अखेरचा श्वास घेतला. ही घटना 14 ऑक्टोबर रोजी घडली असून, प्रार्थनाने आज सोशल मीडियाच्या माध्यमातून ही माहिती दिली. तिने आपल्या वडिलांप्रती भावना व्यक्त करणारी एक भावनिक पोस्ट शेअर केली आहे. प्रार्थनाने तिच्या अधिकृत इन्स्टाग्राम अकाऊंटवर वडिलांचा फोटो शेअर करत आपल्या भावनांना वाट मोकळी करून दिली. तिच्या चाहत्यांनी आणि सहकलाकारांनी सोशल मीडियावरून तिला सांत्वनाचे संदेश पाठवले आहेत.
प्रार्थना वडिलांना श्रद्धांजली वाहताना म्हणते, “मर के भी किसी को याद आएंगे, किसी के आंसुओं में मुस्कुराएंगे, कहेगा फूल हर कली से बार बार, जीना इसी का नाम है.. माझे बाबा… १४ ऑक्टोबर रोजी त्यांचे निधन दुर्दैवाने एका road अपघातात झाले.”
प्रार्थनाने पुढे वडिलांच्या आठवणींना उजाळा दिला आहे. “बाबा…, तुमच्या जाण्यानंतर आयुष्य जणू थांबल्यासारखं वाटतंय. तुमचं हास्य अजूनही आमच्या कानात गुंजतं, तुमचा आत्मविश्वास आमच्या मनाला बळ देतो, आणि तुमचं जीवन पाहून आम्हाला शिकायला मिळालं की आनंद म्हणजे परिस्थिती नव्हे, तर दृष्टिकोन असतो,” अशा शब्दांत तिने आपल्या भावना व्यक्त केल्या आहेत.
तुमचा प्रामाणिकपणा, सेवाभाव आणि लोकांप्रती असलेलं निस्सीम प्रेम आम्हाला माणुसकीचं खरं मूल्य शिकवून गेलं. तुम्ही आम्हाला शिकवलंत की इतरांना मदत करणे हेच खरं समाधान आहे. आज तुम्ही आमच्यासोबत नसला तरी तुमचा आवाज आणि गाणी आम्हाला सतत बळ देतात
तुमची अचानक झालेली exit, मनाला भयंकर लागली आहे. काल परवा पर्यंत सगळ अलबेल होतं. तुमच्या अकाली जाण्याने आम्ही सगळेच खुप दुखावलो आहोत. प्रत्येक क्षणी तुमची आठवण येतच रहाणार आहे. पण या सगळ्या घटनेला वेगळ्या दृष्टीने पाहीलं तर, तुम्ही अधिक प्रत्येकाच्या जवळ रहाणार आहात. कारण तुम्ही स्मरणात रहाणार. प्रत्येक वेळी प्रत्येक क्षणी, आम्ही आमच्या मनाला वाटेल तेव्हा, तुमच्याशी संवाद साधू शकतोय.
तुम्हाला आजपर्यंत अभिमान वाटेल अशीच कामगिरी मी करत आली आहे. आता अधिक जोमाने कामाला सुरुवात करणार आहे. तुम्ही जिथे कुठे असाल, तुम्हाला माझ्या अप्रतिम कामाने श्रध्दांजली अर्पण करत रहाणं, हे माझं कर्तव्य आहे. डोळ्यातलं पाणी कधीच तुम्हाला दिसू नये याची काळजी घेईन. कारण मलाही तुम्हाला धूसर पहायचं नाही. तुमचं ओठावरचं हसू, मनात घर करून राहीलं आहे. तेच टिकवण्याची जबाबदारी मी घेणार आहे.
काळजी करू नका… मी खुप strong आहे. कारण माझ्या पाठीशी नाही तर, तुम्ही सोबत आहात याची खात्री आहे. I LOVE YOU BABA , MISS YOU FOREVER अशी भावुक पोस्ट अभिनेत्री प्रार्थना बेहेरेने लिहिली आहे.
बेहेरे कुटुंबावर दु:खाचा डोंगर
प्रार्थना बेहेरेच्या या पोस्टवर मराठी सिनेसृष्टीतील कलाकारांनी तिच्या वडिलांना श्रद्धांजली वाहिली आहे. तसेच काहींनी अभिनेत्रीला धीर देण्याचा प्रयत्न केला आहे. वडिलांच्या निधनामुळे प्रार्थनाच्या संपूर्ण कुटुंबावर दु:खाचा डोंगर कोसळला आहे.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited
