अमरनाथ यात्रेची ऑफलाइन नोंदणी सुरू, शुल्क 220 रुपये: यंदा 38 दिवसांची यात्रा, 3 जुलैपासून होणार प्रारंभ

जम्मू-काश्मीरमधील पवित्र अमरनाथ यात्रेसाठी मंगळवारपासून ऑफलाइन नोंदणी सुरू झाली. ३८ दिवसांच्या या यात्रेला ३ जुलैपासून प्रारंभ हाेईल, तर रक्षाबंधनाला ९ ऑगस्ट रोजी समाराेप होईल. श्री अमरनाथजी श्राइन बोर्डातर्फे नोंदणीसाठी देशातील ५३३ बँक शाखांमध्ये सुविधा उपलब्ध करून देण्यात आली आहे. याशिवाय बोर्डाच्या संकेतस्थळावरही नोंदणी सुरू झाली.

नोंदणीशिवाय यात्रेत प्रवेश मिळणार नाही. गतवर्षी ५.१२ लाख यात्रेकरूंनी बाबा बर्फानीचे दर्शन घेतले होते. १२ वर्षांतील हा गर्दीचा विक्रम होता. तेव्हा यात्रा ५२ दिवस चालली होती. यंदा तो विक्रमही मोडू शकतो. १३ वर्षांखालील वयाची मुले, ७० वर्षांपेक्षा अधिक वयाचे ज्येष्ठ व सहा महिन्यांच्या गर्भवतींना यात्रेत प्रवेश नसेल. श्राइन बोर्डातर्फे भक्तांच्या नोंदणीसाठी यंदा २२० रुपये शुल्क घेतले जाईल. गतवर्षी फक्त १५० रुपये घेण्यात आले होेते. यात्रेत विशेष दिवस असेल तर नोंदणी ८ दिवस आधीच बंद होईल. यानंतर पुन्हा नोंदणी सुरू होणार आहे.

तुमच्यासाठी महत्त्वाचे असे सर्वकाही…

जम्मूतील बँकेत नोंदणी करताना भाविक. अमरनाथ यात्रा किती कठीण असते? समुद्रसपाटीपासून १३ हजार फुटांवर ही पवित्र गुहा आहे. यात्रेचे दोन मार्ग आहेत. दक्षिण काश्मिरातील गांदरबल जिल्ह्यातील बालटाल व अनंतनागच्या पहलगामपासून. बालटापासून गुहा १४ किमी तर पहलगामहून ४८ किमी. ऑनलाइन रजिस्ट्रेशन कसे करावे लागेल? shriamarnathjishrine.com व jksasb.nic.in वर नोंदणी करु शकता. सर्व कागदपत्रांची डिजिटल कॉपी अपलोड करावी लागेल. यात्रेचा स्लॉटही आधी बुक करता येईल. ऑफलाइन नोंदणी कुठे करावी लागेल? देशातील पंजाब नॅशनल बँकेच्या ३०९ शाखा, एसबीआय, एस बँक, जम्मू-काश्मीर बँकेत नोंदणीची सोय. नोंदणी करताना केवायसी व हेल्थ सर्टिफिकेट द्यावे लागेल. नोंदणीसाठी कोणकोणती कागदपत्रे लागतील? आधार कार्ड, पासपोर्ट, मतदान कार्ड,ड्रायव्हिंग लायसन्स यापैकी एक. पासपोर्ट साइज फोटो. सर्व वयाच्या भक्तांना राज्यातील अधिकृत डॉक्टरांनी प्रमाणित केलेले हेल्थ सर्टिफिकेट द्यावे लागेल. ऑनलाइन नाेंदणी करताना ते पीडीएफ स्वरूपात अपलोड करावे लागेल.