अमरावती येथील मठात अल्पवयीन मुलीवर बलात्कार: गळ्यावर पाय ठेवून दिली जीवे मारण्याची धमकी, मठ प्रमुखासह मुनी व मावशीला अटक – Amravati News

.

आरोपी मठ प्रमुख सुरेंद्रमुनी तळेगावकर (वय 75), मठातील मुनी आरोपी बाळासाहेब देसाई (वय 40) व आरोपी महिला अशी अटक झालेल्या आरोपींची नावे आहेत. या अल्पवयीन मुलीचे कुटुंबीय सर्वच एका पंथाचे आहेत आणि ते वेगवेगळ्या मठात राहतात. संबंधित मुलगी गेल्या वर्षभरापासून रिद्धपूर येथील सुरेंद्रमुनी तळेगावकर याच्या मठात मावशीसोबत राहत होती. ती सेवक म्हणून गत एक वर्षापासून मठातच मुनींची सेवा करीत होती.

गळ्यावर पाय ठेवून दिली जीवे मारण्याची धमकी

मठप्रमुख सुरेंद्र तळेगावकर याने 2 एप्रिल 2024 ला तिच्या मावशीच्या मार्फत मुलीला त्याच्या तळघरातील खोलीत बोलाविले आणि तिच्यावर अत्याचार केला. त्यानंतर मठातच राहणाऱ्या बाळासाहेब देसाई यानेसुध्दा तिच्यावर अत्याचार केला. यावेळी मुलीने विरोध केला तेव्हा तिच्या गळ्यावर पाय ठेवून कोणाला काही सांगितले तर जीवे मारून टाकेल, अशी धमकी देण्यात आली. घडलेला प्रसंग पीडित मुलीने मावशीला सांगितला, मात्र तिने देखील त्या कृत्याचे समर्थन केले व कोणाला काही सांगू नको असे बजावले. तसेच या मुलीला मठाच्या बाहेर देखील जाऊ दिले जात नव्हते. तसेच मावशी बळजबरी तिला सुरेंद्र मुनीकडे तळघरात पाठवायची आणि दोन्ही मुनी तिच्यावर बलात्कार करीत होते. तर तिची मावशी त्यांना सहकार्य करीत होती.

मुलगी गर्भवती असल्याचे वडिलांच्या लक्षात आले

वारंवार या अल्पवयीन मुलीवर बलात्कार होत राहिले व त्यात ती गर्भवती असल्याचे लक्षात आले. ही गोष्ट लक्षात येताच तिची मावशी व मठातील इतर मुनी व दीक्षा घेतलेल्या महिलांनी हा प्रकार दाबण्याचा प्रयत्न केला. एकदा मुलीचे वडील मठात तिला भेटायला आले तेव्हा आपली मुलगी गर्भवती असल्याचे त्यांच्या लक्षात आले व तातडीने त्यांनी पोळी ठाण्यात धाव घेतली. या प्रकरणी शिरखेड पोलिसांनी वरिष्ठांना माहिती दिली व मुलीची वैद्यकीय तपासणी करण्यात आली. तपासात मुलगी गर्भवती असल्याचे निष्पन्न होताच पोलिसांनी मठात धाव घेतली. मुलीच्या तक्रारीवरून बलात्कार व बाल लैंगिक अत्याचाराचा गुन्हा नोंदवून सुरेंद्र तळेगावकर, बाळासाहेब देसाई आणि पीडितेची मावशी यांना अटक केली आहे. पुढील तपास शिरखेड पोलिस करीत आहे.