ब्युरो रिपोर्ट, झी 24 तास : राज्यातील अनेक जिल्ह्यांमध्ये झालेल्या अवकाळी पावसाने शेतकऱ्यांचं मोठं नुकसान झालंय.. कोकण विदर्भ आणि उत्तर महाराष्ट्रातील जिल्ह्यांना याचा सर्वाधिक तडाखा बसल्याचं पाहायला मिळालं. अवकाळीमुळे शेतकऱ्यांची उभी पिकं आडवी झालीयत.. त्यामुळे राज्यातील शेतकरी हवालदिल झालाय.
राज्यातील अनेक जिल्ह्यांना अवकाळी पावसाने झोडपून काढल्याने शेतकऱ्यांचं मोठं नुकसान झालं आहे. विदर्भ, उत्तर आणि मध्य महाराष्ट्रासह इतरही अनेक जिल्ह्यांमध्ये अवकाळीचा मोठा फटका शेतकऱ्यांना बसला आहे. नाशिकच्या मांडसांगवीत द्राक्ष बागांना अवकाळीचा तडाखा बसला आहे. अवकाळीमुळे काढणीला आलेल्या द्राक्षांचं मोठं नुकसान झालं आहे. त्यामुळे द्राक्ष बागायतदारांना लाखोंचा फटका बसला आहे.
देशाची 40 टक्के कांद्याची गरज भागवणाऱ्या नाशिक जिल्ह्यात अवकाळी पावसाने कांढणीला आलेला उन्हाळी कांदा जमीनदोस्त केलाय. नाशिक जिल्ह्यातील बागलाण, देवळा, सटाणा परिसरात कांद्याचं अतोनात नुकसान झालं आहे.
नंदुरबार जिल्ह्यातही अवकाळी पावसाचा जोरदार तडाखा बसला आहे. ठाणेपाडा आणि गंगापूर भागात जोरदार गारपीट झालीय.. या अवकाळीच्या ताडाख्याने 100 हेक्टरहून अधिक क्षेत्रावरील कांदा पिकाचं नुकसान झालं आहे. हरभरा, गहू, मक्याचं पीकही भुईसपाट झालं आहे. तर गारपीटीमुळे टरबुजाच्या पिकाचंही नुकसान झालं आहे.
धुळे जिल्ह्यालाही अवकाळी पावसानं झोडपून काढलं आहे. धुळे जिल्ह्यातील नेर, कापडणे, म्हसदी या परिसराला अवकाळी पावस आणि गारपीटीचा सर्वाधिक फटका बसला आहे. वादळी वाऱ्यासह आलेल्या पावसामुळे फळबागांचा मोहोर गळून पडला आहे. या ठिकाणी काढलेला आलेली पीकं भुईपाट झाली आहे. या नुकसानीचे तात्काळ पंचानामे करण्यात यावे अशी मागणी शेतकऱ्यांनी केली आहे.
वर्धा जिल्ह्यातही अवकाळीचा मोठा तडाखा बसलाय.. सोसाट्याच्या वाऱ्यासह अवकाळी पावसाने पपईची बाग उद्ध्वस्त झाली आहे. दीड एकरावरील पपईची बाग भुईसपाट झालीय.. त्यामुळे शेतकऱ्याचं लाखो रुपयांचं नुकसान झालं आहे.
अवकाळी पावसामुळे अकोला जिल्ह्यातील बाळापूर, अकोट, तेल्हारा तालुक्यात पिकांचं मोठं नुकसान झालाय. तेल्हारा तालुक्यात वादळी वाऱ्यासह मोठ्या प्रमाणात पाऊस झालाय.. यामुळे शेतातील आंबा, गहू, कांदा आणि फळबाग पिकांना फटक बसलाय. गहू अक्षरशः झोपला असून आंबे वादळी वाऱ्यामुळे गळून पडलेत. तर कांदा पूर्णपणे भिजलाय.
नागपूरमध्येही अवकाळीचा तडाखा बसला आहे. कळमना कृषी उत्पन्न बाजार समितीत शेतकऱ्यांनी विक्रीसाठी आणलेलं धान्य अवकाळीमुळे भिजून गेलं आहे. गहू, तूर आणि चण्याची 10 ते 12 हजार पोती भिजल्याचा अंदाज वर्तविला जात आहे.
अहिल्यानगर जिल्ह्यातील संगमनेर आणि अकोले तालुक्यात झालेल्या अवकाळी पावसाने शेतकऱ्यांचं अतोनात नुकसान झालं आहे. हातातोंडाशी आलेला कांदा, गहू भुईसपाट झाला आहे. तर वाटाणा, मका आदी पिकांचंही नुकसान झालं आहे.
रत्नागिरीत अवकाळी पावसामुळे आंबा बागायतदारांना फटका बसलाय. पावसामुळे तोडणीला आलेल्या आंब्याचे मोठं नुकसान झालं आहे. त्यामुळे आंब्यावर आता फवारणी करावी लागणार आहे. फवारणी आणि कामगारांच्या खर्चाचा भुर्दंड बागायतदारांना बसणार आहे..
अवकाळी पावसाच्या तडाख्याने शेतकरी मोठ्या संकटात सापडलाय. आधीच पिकाला हमी भाव नसल्यानं शेतकऱ्याला उत्पादन खर्चही निघणं अवघड झालंय. त्यातच आता अवकाळीच्या तडाख्यानं शेतकरी मोठ्या संकटात सापडलाय. त्यामुळे सरकारने तत्काळ पंचनामे करून शेतकऱ्यांनी नुकसान भरपाई देणं गरजेचं आहेत.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
