Icharlakaranji Crime: कोल्हापूरचं इचलकरंजी शहर सध्या एका वेगळ्याच कारणामुळे प्रकाशझोतात आलंय. इथले रहिवासी रोज दहशतीत जगतात.इथल्या गुन्हेगारीचा आलेख शिखर गाठू लागलाय. काय आहे या मागचं कारण? जाणून घेऊया.
एकेकाळी यंत्रमागाच्या खडखडाटांन इचलकरंजी शहराला मिनी मँचेस्टर ही ओळख मिळवून दिली. मात्र आता या शहरातल्या यंत्रमागाच्या खडखडाटाची जागा गोळीबाराच्या आवाजानं घेतलीये. शहरात खून, मारामा-या, अपहरण, चोरी, दरोडे अशा गुन्ह्यांचं प्रमाण वाढलंय. त्यामुळे गुंडांची नगरी अशी नवी ओळख इचलकरंजीला मिळालीये. शहरासह इथल्या गावांमध्ये 15हून गँग सक्रीय झाल्यात. त्यापैकी जर्मन गँग ही खून, डबल मर्डर, दरोडा, खंडणीसाठी अपहरण, हाणामारी,जबरी चोरी, दरोडा, शस्त्र बाळगणे अशा गुन्ह्यांसाठी ओळखली जाते.
शहरातील जवाहर भागात ही गँग सक्रीय आहे. या गँगमधील 50हून अधिक गुंडांना मकोका लागलाय. इचलकरजीच्या गावभागात ST गँग सक्रीय आहे. इचलकरंजीच्या माजी नगरसेवकाची ही गँग खून, खंडणी, अपहरण, हाणामारी यासाठी फेमस आहे. शहरातील जवाहरनगर आणि शहापूर भागात MK गँगचं वर्चस्व आहे. एक माजी नगरसेवक ही गँग चालवतो.. गणेशनगर परिसरात बाबर गँग सक्रीय आहे. खून, जबरी चोरी, खंडणी, लूटमारीचे गुन्हे या गँगवर दाखल आहेत. या गँगनं इचलकरंजी शहराबरोबर चंदगड, संकेश्वर, गडहिंग्लज भागातही आपले पाय पसरवायला सुरुवात केलीये. या गँगसोबत शहापूर, तारदाळ, तीन बत्ती चौक, जवाहर नागर भागात लाखे गँग, रौफलाला गँगचं प्राबल्य आहे.
एरियात आपला दबदबा कायम ठेवण्यासाठी गुंडांच्या या टोळ्या नेहमीच दहशत पसरवत असतात. मग चौकात शस्त्रांचं खुलेआम प्रदर्शन करत वाढदिवस साजरे होतात. सामान्य नागरिकांच्या घरांवर दगडफेक होते. त्यामुळे इथले नागरिक मात्र सतत दहशतीत असतात.
तक्रार आल्यानंतर पोलीस या गँगच्या सदस्यांची धरपकड करतात. मात्र हे गुंड जामीनावर लगेच सुटतात.आणि शहरात पुन्हा सुरु होते त्यांची दहशत. पोलीस प्रशासन या गुंडांचा बंदोबस्त करण्यात सपशेल अपयशी असल्याचा आरोप स्थानिकांनी केलाय. या गुंडांवर कोणाचा वरदहस्त आहे याचा शोध पोलिसांनी घ्यावा आणि या गुंडांचा कायमचा बंदोबस्त करावा अशी मागणी इचलकरंजकर करत आहेत.
इचलकरंजी शहर वस्त्रोद्योगात आघाडीवर आहे. या शहराचे प्रश्न वेगळे आहेत. या गुंडांच्या टोळक्यांनी त्यात आणखीनच भर टाकलीये. नुकतंच बीड शहर गुंडगिरीमुळे प्रकाशझोतात आलं. आता इचलकरंजीही त्याच वाटेवर जाणार का असा अशी भीती इचलकरंजीकरांना सतावू लागलीये.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
