Maharashtra Weather News : भर उन्हाळ्यात अचानकच महाराष्ट्रासह दक्षिण भारतामध्येसुद्धा पावसासाठी पूरक वातावकरणनिर्मिती होताना दिसत आहे. राज्याच्या बहुतांश भागांमध्ये सध्या अवकाळीचे ढग घोंगावत असून, त्याचा थेट परिणाम उत्तर महाराष्ट्रापासून थेट कोकण आणि विदर्भापर्यंत पाहायला मिळत आहेत. हवामान विभागाच्या माहितीनुसार पुढील 24 तासांमध्येही अवकाळीच्या ढगांचं सावट विदर्भ, मध्य महाराष्ट्र आणि मराठवाड्यावर कायम राहणार आहे.
राज्याच्या हवामानात होणाऱ्या बदलांमध्ये सातत्य कायम असून, बुधवारीसुद्धा हेच चित्र पाहायला मिळालं. पुढील चार ते पाच दिवस राज्यात ही स्थिती कायम राहणार असून, यादरम्यान अवकाळी पावसासह राज्यावर गारपिटीचाही मारा होणार असल्याचा इशारा देण्यात आल्यानं नागरिकांच्या चिंतेत भर पडली आहे.
तापमानाचा आकडा कमी होईना…
एकिकडे तापमानाचा आकडा 38 ते 39 अंशांदरम्यान असतानाच काही भागांमध्ये उष्मा इतका वाढला आहे की हेच तापमान 42 अंशांइतकं असल्याचं भासत आहे. मुंबईसह ठाणे, रायगड, पालघर आणि कोकण किनारपट्टी भागांमध्येही हवेत आर्द्रतेचं प्रमाण वाढल्यानं उकाडा अधिक तीव्रतेनं जाणवत आहे. राजच्याच्या बहुतांश भागांमध्ये ढगाळ वातावरण असलं तरीही उष्णतेचा दाह मात्र काही केल्या कमी होताना दिसत नाहीय.
पुढील 24 तासांसाठी मुंबई शहर आणि उपनगरांमध्ये पावसाच्या तुरळक सरींच्या शक्यतेसह ढगाळ वातावरणाचा अंदाज वर्तवण्यात आला आहे. तर, विदर्भात वादळी वारे आणि विजांच्या कडकडाटासह अवकाळीचा इशारा देण्यात आला आहे. गारपिटीचा तडाखाही या भागाला बसेल असं सांगत हवामान विभागानं सतर्क केलं आहे. मराठवाड्यातही परिस्थिती वेगळी नसून जालन्यामध्येही पुढच्या 24 तासांमध्ये अवकाळीचा तडाखा बसणार आहे.
अचानक अवकाळी आणि गारपिटीचा मारा का होतोय?
एप्रिल आणि मे महिन्यात सहसा उकाडा वाढून अंगाची काहिली होते. सध्या राज्यात अशी स्थिती निर्माण होत असली तरीही या वाढीव उष्णतेसमवेत राज्याला अवकाळीचा मारासुद्धा सोसावा लागत आहे. यामागील आणखी एक महत्त्वाचं कारण म्हणजे, पश्चिम बंगाल, हिमालय क्षेत्र ते मध्य प्रदेशपर्यंत तयार झालेली चक्रीवादळसदृश परिस्थिती. बंगालच्या उपसागरातून वाहणारे आर्द्रतायुक्त पूर्वीय वारे आणि उत्तर भारतातून महाराष्ट्राकडे विरुद्ध दिशेने येणारे वारे एकत्र येत असून, महाराष्ट्रातून ओडिशापर्यंत तयार होणाऱ्या कमी दाबाच्या पट्ट्यामुळे राज्यात अवकाळीसाठी पूरक वातावरणनिर्मिती होताना दिसत आहे.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
