‘एनएचएम’चा मंगळवारपासून बेमुदत संप: सातारा जिल्ह्यातील 1 हजार 150 आरोग्य कर्मचारी होणार सहभागी – Kolhapur News

.

राज्याच्या हिवाळी अधिवेशनात राष्ट्रीय आरोग्य अभियान अंतर्गत कंत्राटी कर्मचाऱ्यांना नियमित करण्याचा निर्णय घेतला आहे. याबाबत मुख्यमंत्री देवेंद्र फडणवीस, आरोग्यमंत्री प्रकाश आबिटकर यांच्याशी भेटी, चर्चा होवूनही त्याबाबत ठोस निर्णय झाला नाही. त्यामुळे राष्ट्रीय आरोग्य अभियान अधिकारी, कर्मचारी एकत्रिकरण समितीने मंगळवारपासून बेमुदत संपाचा इशारा दिला आहे. राज्यगातील सुमारे ३५ हजार डॉक्टर्स, कर्मचारी त्यात सहभागी होणार आहेत.

सातारा जिल्ह्यात ११५० एनएचएम कर्मचारी असुन, त्यातील ३२५ जणांची सेवा दहा वर्षे पूर्ण झाली आहे. हेही या संपात सहभागी होणार आहेत. जिल्हा रुग्णालय, तीन उपजिल्हा रुग्णालये, १८ ग्रामीण रुग्णालये, नागरी केंद्र, ८४ प्राथमिक आरोग्य केंद्रे, ४१५ उपकेंद्रांमध्ये ४० टक्क्यांहून अधिक डॉक्टर्स, कर्मचारी हे एमएचएममधील आहेत. ते संपावर गेल्याने सार्वजनिक आरोग्य यंत्रणा कोलमडून पडणार आहेत.

काम तेच, पण वेतन मात्र निम्म्याहून कमी

राष्ट्रीय आरोग्य अभियानातील कंत्राटी कर्मचारी हे आधुनिक गुलामगिरीचे बळी ठरत आहेत, अशी भावना त्यांच्यात निर्माण झाली आहे. राष्ट्रीय आरोग्य अभियान हे जनतेच्या आरोग्यासाठी सुरु झालेले एक महत्वाकांक्षी स्वप्न आहे. पण, या स्वप्नामागे घाम गाळणाऱ्या कंत्राटी कर्मचाऱ्यांची अवस्था पाहिली, तर ती काही वेगळी नाही तर आधुनिक गुलामगिरीचीच! ‘तेच काम, पण वेतन मात्र निम्म्याहूनही कमी! कायम कर्मचाऱ्यांना मिळणाऱ्या सुविधा, पण कंत्राटी कर्मचाऱ्यांना केवळ आश्वासने! कठीण प्रसंगी सेवा मात्र त्यांचीच अपेक्षित, पण सन्मान शून्य!’ अशी संतप्त भावना कर्मचाऱ्यांत आहे.

कसला न्याय? कसला विकास?

कंत्राटी कर्मचारी रात्रंदिवस काम करतात. कोविडसारख्या आपत्तीला तोंड देतात, गावोगावी लसीकरण मोहिमा राबवतात, रक्ताचा एक थेंब न उरलेला होईपर्यंत सेवा देतात. तरीही त्यांच्याशी केलेली वागणूक ही केवळ शोषण आणि अपमान आहे. आम्हाला कसला न्याय? आमचा कसला विकास? असा संतप्त सवाल हे कर्मचारी उपस्थित करत आहेत.