अमरावतीमध्ये राष्ट्रीय आरोग्य अभियानाच्या (एनएचएम) कर्मचाऱ्यांचा कायम नोकरीसाठीचा संप दहाव्या दिवशीही सुरू आहे. कर्मचाऱ्यांनी एनएचएम आयुक्तांचे कामावर परतण्याचे आदेश धुडकावून लावले आहे.
.
आंदोलनकर्त्यांनी ऋषिपंचमी निमित्त आंदोलनस्थळी झुणका-भाकरीचा प्रसाद घेतला. शासनाने गतवर्षी १० वर्षांची सेवा पूर्ण केलेल्या कर्मचाऱ्यांना कायम करण्याचा निर्णय घेतला होता. मात्र अद्याप त्याची अंमलबजावणी झालेली नाही. त्यामुळे १९ ऑगस्टपासून कर्मचारी राज्यव्यापी संपात सहभागी झाले आहेत.
संपकर्त्यांनी आज आंदोलनस्थळी रक्तदान शिबिराचे आयोजन केले. यापूर्वी त्यांनी जिल्हा परिषदेपासून विभागीय आयुक्त कार्यालयापर्यंत मोर्चा काढला होता. जिल्हा परिषदेचे सीईओ, जिल्हाधिकारी आणि खासदारांना निवेदने दिली होती.
‘आयटक’शी संबंधित महाराष्ट्र राज्य आरोग्य खाते कंत्राटी नर्सेस युनियन आणि राष्ट्रीय आरोग्य अभियान कर्मचारी एकत्रीकरण समितीच्या नेतृत्वात हे आंदोलन सुरू आहे. जिल्ह्यातील २०० डॉक्टर, ६०० परिचारिका आणि अन्य कर्मचाऱ्यांसह एकूण दीड हजार कर्मचारी या संपात सहभागी आहेत.
उद्या शुक्रवारी आंदोलनकर्ते राज्याचे महसूल मंत्री तथा जिल्ह्याचे पालकमंत्री चंद्रशेखर बावनकुळे यांची भेट घेणार आहेत. या संपामुळे ग्रामीण भागातील आरोग्य सेवा प्रभावित झाली आहे.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
