कात्रजमध्ये जमिनीच्या वादातून तरुणाचा खून: सराईत गुन्हेगार अमर साकोरे आणि दोन साथीदारांविरुद्ध गुन्हा दाखल – Pune News

.

शुभम सुभाष चव्हाण असे खून झालेल्या तरुणाचे नाव आहे. याप्रकरणी सराईत गुन्हेगार अमर साकोरे याच्यासह तीन आरोपी विरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, शुभम आणि आरोपी अमर यांच्यात एका जमिनीच्या जागेवरुन आर्थिक वाद होता. शुभम रविवारी पहाटे कात्रजमधील संतोषनगर भागातून जात होता. त्यावेळी आरोपी अमर आणि त्याच्याबरोबर असलेल्या साथीदारांनी त्याला जबरदस्तीने अडविले. आरोपींनी त्याला शिवीगाळ करून बेदम मारहाण करण्यास सुरुवात केली. आरोपींच्या तावडीतून वाचण्यासाठी शुभम तेथून कसाबसा पळाला. आरोपींनी त्याचा पाठलाग करत त्याला बांबूने बेदम मारहाण केली. तसेच त्याच्या डोक्यात दगड घालून खून केला. या घटनेची माहिती मिळताच आंबेगाव पोलिसांनी घटनास्थळी धाव घेतली.पसार झालेले आरोपी अमर साकोरे आणि त्याच्याबरोबर असलेल्या दोन साथीदारांचा शोध घेण्यात येत आहे. वरिष्ठ पोलीस निरीक्षक शरद झिने यांच्या मार्गदर्शनाखाली पुढील तपास करण्यात येत आहे.

एटीएमधून रोकड काढणाऱ्या ज्येष्ठाची फसवणूक

एटीएमधून रोकड काढणाऱ्या ज्येष्ठ नागरिकाची चोरट्याने ५० हजार रुपयांची फसवणूक केल्याची घटना नवी पेठेतील शास्त्री रस्त्यावर घडली.

याबाबत एका ज्येष्ठ नागरिकाने विश्रामबाग पोलीस ठाण्यात फिर्याद दिली आहे. तक्रारदार ६८ वर्षीय ज्येष्ठ नागरिक धनकवडी भागात राहायला आहेत. त्यांनी दिलेल्या फिर्यादीनुसार अनोळखी चोरट्याविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, तक्रारदार नवी पेठेतील शास्त्री रस्त्यावर असलेल्या एका बँकेच्या एटीएममधून पैसे काढण्यासाठी गेले होते. त्या वेळी त्यांच्या पाठोपाठ एक चोरटा एटीएममध्ये शिरला. एटीएममधून पैसे निघत नाहीत, अशी बतावणी चोरट्याने त्यांच्याकडे केली. एटीएममधून पैसे काढून देण्यास मदत करतो, अशी बतावणी करुन चोरट्याने त्यांच्याकडून एटीएम कार्ड घेतले. त्यानंतर चोरट्यांनी त्यांच्याकडील एटीएम कार्ड स्वत:कडे ठेवले. एटीएम वापराचा सांकेतिक शब्द चोरट्याने त्यांच्याकडून घेत फसवणूक केली.