भरधाव वेगात असलेल्या मालवाहू ट्रकने दुचाकीला दिलेल्या धडकेत दुचाकीवरील दोघांचा जागीच मृत्यू झाला. हा अपघात चिकलठाणा येथील बजरंग चौकाजवळ शुक्रवारी रात्री दहा वाजण्याच्या सुमारास घडला. विकास विठ्ठल मोरे आणि प्रदीप दादाराव गाडेकर अशी मृतांची नावे आहेत.
.
याबाबत चिकलठाणा एमआयडीसी पोलिसांनी दिलेल्या सविस्तर माहितीनुसार, दुचाकीस्वार दोघेही मयत तरूण हे शेंद्रा एमआयडीसी येथील एकाच कंपनीत सोबत कामाला होते. छत्रपती संभाजीनगर येथून मित्रांच्या लग्नावरून परतून रात्रीच्या शिफ्टला शेंद्रा एमआयडीसी येथील कंपनीत कामावर जात असताना पाठीमागून भरधाव वेगाने आलेल्या मालवाहू ट्रकने दुचाकीला जोराची धडक दिली. ही धडक एवढ्या जोरात होती की, दुचाकीवरील दोन्हीही तरुण काही फुट हवेत उडून खाली कोसळून दूरवर फरफटत गेले होते. दोघांच्याही डोक्याला जबर मार लागून मोठा रक्तप्रवाह झाल्याने ते जागीच मृत्यूमुखी पडले.
स्थानिक नागरिक व काही वाहनचालकांच्या मदतीने दोघांनाही तत्काळ छत्रपती संभाजीनगर येथील शासकीय रुग्णालयात दाखल करण्यात आले. मात्र तेथील डॉक्टरांनी दोघांनाही तपासून मृत घोषित केले होते. प्रदीप गाडेकर याच्यावर चित्तेपिंपळगाव येथील गाडेकर वस्तीवरील स्मशानभूमीत, तर विकास याच्यावर पांढरी येथील स्मशानभूमीत शोकाकुल वातावरणात शनिवारी दुपारी अंत्यसंस्कार करण्यात आले. याप्रकरणी चिकलठाणा एमआयडीसी पोलिस ठाण्यात ट्रक चालकाच्या विरुद्ध गुन्हा दाखल करण्यात आला असून पुढील तपास पोलिस करत आहेत.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
