कारवाई: हरियाणातून यूट्यूबरला अटक; पाकिस्तानी अधिकाऱ्यास देत होती गोपनीय माहिती, पाक अधिकाऱ्याच्या संपर्कात, 3 वेळा प्रवासही

हरियाणा पोलिसांनी ट्रॅव्हल ब्लॉगर ज्योती राणी ऊर्फ ज्योती मल्होत्रा हिला हिसारमधून अटक केली. तिच्याविरुद्ध सरकारी गोपनीयता कायदा आणि बीएनएसच्या कलमांखाली गुन्हा दाखल करण्यात आला. एक दिवस आधीच एका पीजी विद्यार्थिनीला पाकिस्तानी गुप्तचर संस्थांशी कथित संबंधामुळे अटक केली होती. शुक्रवारी रात्री २ वाजता अटक केलेल्या ज्योतीला शनिवारी कोर्टाने ५ दिवसांची पोलिस कोठडी सुनावली.

आयबी व पोलिस ज्योतीवर नजर ठेवून होते. ‘ट्रॅव्हल-विथ-जो’ नावाचे यू-ट्यूब चॅनल चालवणारी ज्योती २०२३ मध्ये पाक व्हिसासाठी दिल्लीला गेली होती. तेथेच पाक उच्चायुक्तालयात तिची एहसान-उर-रहीम ऊर्फ दानिशशी भेट झाली. तेव्हापासून ते संपर्क होते. ज्योती ३ वेळा पाकला गेली. तेथे ती अली अहवानला भेटली. ती गुप्तचर अधिकारी शाकिर व राणा शहबाज यांनाही भेटली.