Maharashtra Weather: महाराष्ट्रातील तापमानात सातत्याने चढ-उतार होताना दिसत आहे. गेल्या दोन ते तीन दिवसांपासून राज्यातील काही जिल्ह्यात अवकाळी पावसाच्या सरी बरसल्या होत्या. मात्र आता पुढील काही दिवसांत उकाड्यात वाढ होण्याची शक्यता आहे. दोन दिवस उष्ण व दमट वातावरणाचा अंदाज व्यक्त करण्यात येत आहे. त्यामुळं काही दिवसांत तापमानात वाढ होऊ शकते.
मागील काही दिवसांपासून राज्यातील बहुतांश भागात पावसाच्या सरी कोसळल्या होत्या. अनेक ठिकाणी ढगांच्या कडकडासह पाऊस झाला होता. त्यामुळं अनेक पिकांची नासाडी झाली आहे. काही वेळ पाऊस पडल्याने उकाड्याने हैराण झालेल्या नागरिकांना काहीसा दिलासा मिळाला होता. मात्र पाऊस पडून गेल्यानंतर पुन्हा उकाडा वाढला आहे. वातावरण बदलाचा परिणाम म्हणून हवामानात उलथापालथ होत आहे. शनिवारी मुंबईत उष्ण वातावरण राहील. पावसाची शक्यता कमी आहे, असा अंदाज हवामान विभागाने वर्तवला आहे.
कोकणात उष्ण व दमट हवामानाची शक्यता आहे. तसंच, दक्षिण मध्य महाराष्ट्र आणि मराठवाड्याच्या दक्षिणेकडील जिल्ह्यात वादळी पावसाची शक्यता असल्याना यलो अलर्ट जारी करण्यात आला आहे. मराठवाडा आणि मध्य महाराष्ट्र परिसरावर चक्राकार वारे, नैऋत्य मध्ये प्रदेशापासून दक्षिण अंतर्गंत कर्नाटकपर्यंत हवेचा कमी दाबाचा पट्टा निवळून गेला आहे. त्यामुळं अरबी समुद्र आणि बंगालच्या उपसागरावरील बाष्पयुक्त वाऱ्यांचा संगम होत असल्याने पावसाला पोषक हवामान होत आहे. जिल्ह्यातील काही भागांत पाऊस हजेरी लावण्याची शक्यता आहे.
एप्रिलमध्ये उष्ण लाटा
यंदाच्या उन्हाळी हंगामात (एप्रिल ते जून) देशाच्या बहुतांश भागात कमाल तापमान सरासरीपेक्षा अधिक राहण्याची शक्यता वर्तविण्यात आली आहे. महाराष्ट्राच्या बहुतांश भागात उन्हाचा चटका तापदायक ठरणार असून, राज्यात तीव्र उष्ण लाटा येण्याचा इशारा हवामान विभागाने दिला आहे. एप्रिल महिन्यात महाराष्ट्र अधिक तापण्याची शक्यता असल्याचे हवामान विभागाकडून सांगण्यात आले.
राज्यासह देशाच्या बहुतांश भागात एप्रिल महिन्यात कमाल तापमान सरासरीपेक्षा अधिक राहण्याची शक्यता आहे. यामध्ये सलग २ ते ५ दिवसांच्या कालावधीत उष्ण लाटा अनुभवायला मिळण्याची शक्यता आहे. उत्तर कोकण आणि मध्य महाराष्ट्रात तीव्र उष्ण लाटांचा इशारा आहे. तर मराठवाडा आणि विदर्भातही काही प्रमाणात उष्ण लाटांची शक्यता आहे. गुजरात तसेच पूर्व किनारपट्टी आणि पूर्व भारतातही उष्ण लाटांचा इशारा देण्यात आला आहे.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
