कोणी कितीही काळ्या बाहुल्या बांधा, माझे वाकडे करु शकत नाही: जनता माझ्यासोबत, जयकुमार गोरेंचा हल्लाबोल – Solapur News

.

मंत्री जयकुमार गोरे पुढे बोलताना म्हणाले की, मी कोणाच्या नादाला लागत नाही. माझ्या नादाला कोणी लागायचे नाही. सावज टप्प्यात आल्याशिवाय मी कधी हात लावत नाही. आता सावज टप्प्यात आले आहे, थोडी वाट बघा. आज जास्त बोलणार नाही, असेही त्यांनी म्हटले आहे. देवाभाऊ आणि भाजप माझ्या पाठिशी असल्याने मी विकास करू शकलो.

नेमके काय म्हणाले गोरे?

जयकुमार गोरे म्हणाले की, आज तुम्ही बघताय अख्खा जिल्हा अख्ख राज्य जयकुमार गोरेला अडवायला रोज सकाळ संध्याकाळी नदीच्या बाजूला जाऊन पूजा घालत काळ्या भावल्या लावत आहे. रोज-रोज पूजा घालत आहे, अरे साध्या घरातले पोरगं 3 वेळा आमदार झाले. माझी एक निवडणूक अशी झाली नाही की ज्या निवडणुकीत माझ्याविरोधात केस झाली नाही. त्यामुळे मला सवय आहे. माझ्या मतदारसंघातील लोकं केसकडे बघतच नाही आता. पण निवडणूक आली आणि जयकुमार गोरेवर केस दाखल झाली नाही असे कधीच झाले नाही. अडवून-अडवून गडी दमलं आणि रडलं पण मी कधी थांबलो नाही.

माझ्या कुणी नादी लागू नये

जयकुमार गोरे म्हणाले की, कितीही जण आडवे येत मला थांबवण्याचा प्रयत्न केला तरी थांबवू शकणार नाही. जोपर्यंत माझ्यापाठीमागे जनता माता-माऊली उभी आहे मला कुणी थांबवू शकत नाही. जो वाईट वागतो त्यांचे कधी चांगले होत नाही. आणि जो कायम चांगले वागत असतो त्यांच्यासाठी तुम्ही कितीही नियोजन करा त्यांचे काहीच वाईट होत नाही. मी कुणाच्या नादाला लागत नाही, माझ्या कुणी नादी लागू नये, असा इशारा जयकुमार गोरे यांनी दिला आहे. जो माझ्या नादाला लागला त्याला मी सोडत नाही, आपला फंडा स्पष्ट आहे. सावज टप्प्यात आल्याशिवाय मी कधी हात लावत नाही. आता टप्प्यात आले आहे, थोडीशी वाट बघा.

गावाच्या विकासासाठीचं खातं माझ्याकडेच

जयकुमार गोरे म्हणाले की, रामभाऊ गावातील सर्व कामं आता माझ्या खात्याच्या अंतर्गत आहे. गावाच्या विकासासाठी जे जे करायचं आहे ते सर्व माझे खाते करु शकते, असे म्हणत राम सातपूतेंच्या मतदारसंघात निधी कमी पडू देणार नाही, असेही त्यांनी म्हटले आहे.