कोल्हापुरातील बंड शमवण्यात ठाकरेंना यश: सुनील प्रभुंच्या मध्यस्थीने संजय पवारांची नाराजी दूर, मातोश्रीवर भेटायला जाणार – Kolhapur News

.

शिवसेना ठाकरे गट आणि मनसे यांच्या संभाव्य युतीच्या चर्चा महाराष्ट्रात सुरू असतानाच, कोल्हापुरात मात्र अंतर्गत बंडाची ठिणगी पडली होती. कोल्हापूच्या जिल्हाध्यक्षपदी रविकिरण इंगवले यांची नियुक्ती झाल्यानंतर संजय पवार नाराज झाले होते. त्यांनी आपल्या पदाचा राजीनामा दिला होता. मात्र उद्धव ठाकरे यांनी फोनवरुन चर्चा केल्यानंतर संजय पवार यांची नाराजी दूर झाली.

शिंदे गटाची ऑफर आणि ठाकरेंचा हस्तक्षेप

संजय पवार यांनी पक्षावर नाराजी दर्शवत राजीनामा दिल्यानंतर शिंदे गटाने ही संधी साधली. मंत्री उदय सामंत यांनी पवारांना एकनाथ शिंदेंच्या शिवसेनेत प्रवेशाची थेट ऑफर दिली. मात्र, ठाकरे गटानेही वेळ न दवडता हालचाली सुरू केल्या. पक्ष नेते सुनील प्रभू यांनी संजय पवार यांच्याशी संपर्क साधत चर्चा केली. त्यानंतर स्वतः उद्धव ठाकरे यांनी संजय पवार यांच्याशी फोनवर संवाद साधत चर्चा केली.

बुधवारी मातोश्रीवर घेणार ठाकरेंची भेट

उद्धव ठाकरेंसोबत झालेल्या चर्चेनंतर संजय पवार यांची नाराजी दूर झाली असून, बुधवारी दुपारी साडे बारा वाजता ‘मातोश्री’वर उद्धव ठाकरेंची भेट घेणार आहेत. या बैठकीत कोल्हापूरमधील राजकीय घडामोडींसह आगामी स्थानिक स्वराज्य संस्थांच्या निवडणुकांची रणनीती आणि पक्षातील अंतर्गत समन्वयावर चर्चा होण्याची शक्यता आहे.

संजय पवार नाराज का होते?

संजय पवार यांची नाराजी कोल्हापूर जिल्हाध्यक्षपदी रविकिरण इंगवले यांची झालेली नियुक्ती ही मुख्य कारण ठरली. पक्षाने आपल्याला विश्वासात घेतले नाही, असा आरोप करत पवारांनी उपनेतेपदाचा राजीनामा दिला. “मी 1990 पासून शिवसैनिक असून काम केले. गेली 36 वर्षे मी एकनिष्ठपणे काम केले. मातोश्रीवरून जे आदेश येतील त्याचे तंतोतंत पालन केले. पण गेली 10 वर्षे बघितले तर काही वेगळे घडत गेले. जिल्हाध्यक्षपदाची निवड करताना विश्वासार्हता आणि पारदर्शकता तपासायला हवी. जिल्हाध्यक्षपदासाठी इच्छुक अनेक होते, पण नियुक्ती करताना उपनेत्याला देखील माहिती नसेल तर काय करायचे? असा सवाल करत आपण शिवसेना उपनेतेपदाचा मी राजीनामा देत असल्याचे संजय पवार म्हणाले होते.

हे ही वाचा…