मराठा आंदोलक मनोज जरांगे पाटील यांनी मुख्यमंत्री देवेंद्र फडणवीस यांना त्यांच्या आईवरून शिवीगाळ केल्याचा आरोप भाजप आमदार प्रसाद लाड व प्रवीण दरेकर यांनी केला आहे. या प्रकरणी त्यांनी जरांगेंवर जोरदार हल्ला चढवत त्यांच्यावर मराठा आरक्षणाच्या नावाखाली द
.
मनोज जरांगे यांनी रविवारी मराठा समाजाची बैठक घेतली. या बैठकीत बोलताना त्यांनी मुख्यमंत्री देवेंद्र फडणवीस यांना त्यांच्या आईवरून शिवीगाळ केल्याचा आरोप आहे. यासंबंधीचा एक कथित व्हिडिओ सोशल मीडियावर आज व्हायरल झाला. त्यानंतर भाजप आमदार प्रसाद लाड यांनी त्यांच्यावर सडकून टीका केली. मनोज जरांगे यांनी देवेंद्र फडणवीस यांच्या आईचा अपमान केला. हा अपमान आम्ही कदापि सहन करणार नाही. हा माझा सल्ला समजा किंवा इशारा समजा. ज्या छत्रपती शिवाजी महाराजांचे नाव घेऊन जरांगे मराठा आरक्षणाची गोष्ट करतात. त्या छत्रपतींनी आपल्या आई-बहिणीणींची इज्जत कशी करावी व त्यांचा सन्मान कसा राखावा हे शिकवले, असे ते म्हणाले.
जरांगेंची आरक्षणाच्या नावाखाली दुकानदारी सुरू – प्रसाद लाड
मनोज जरांगे हे छत्रपती शिवाजी महाराजांच्या महाराष्ट्रात मराठा आरक्षणाच्या नावाखाली दुकानदारी चालवत आहेत. महिलांचा अपमान करत आहेत. त्यांना एवढीच खाज असेल तर ते एवढी वर्षे आरक्षण न देणाऱ्या शरद पवारांचे नाव का घेत नाहीत. निवडणुका आल्या की त्यांचे राजकीय भांडवल फुगते आणि ते आरक्षणाची नौटंकी सुरू करतात. यापुढे तुम्ही देवेंद्र फडणवीस व त्यांच्या आईविषयी एक जरी अपशब्द वापरला तर तुम्हाला तुमच्याच भाषेत उत्तर द्यायला आम्ही मागेपुढे पाहणार नाही. हा माझा तुम्हाला इशारा आहे असे समजून चला, असेही प्रसाद लाड यावेळी जरांगेंवर टीका करताना म्हणाले.
जरांगे शरद पवारांच्या पालख्या वाहतात -प्रवीण दरेकर
दुसरीकडे, भाजप आमदार प्रवीण दरेकर यांनीही या प्रकरणी मनोज जरांगेंवर निशाणा साधला आहे. सुसंस्कृत महाराष्ट्र मनोज जरांगे यांना कधीही माफ करणार नाही. डीजेवर बंदी घातली मुंबई उच्च न्यायालयाने, कायद्याची जबाबदारी पोलिसांवर आणि जरांगे घसरत आहेत मुख्यमंत्र्यांच्या आईवर. वैयक्तिक द्वेषाने पछाडलेल्या जरांगेंनी पुन्हा एकदा मुख्यमंत्र्यांच्या आईचा अपमान केला. असे करणारा माणूस छत्रपती शिवाजी महाराजांना मानणारा असूच शकत नाही. शरद पवारांचे कौतुक करायचे. त्यांच्या पालख्या वाहायच्या आणि दुसऱ्या बाजूला आई-बहिणीवरून शिव्या द्यायच्या हे कुठले धोरण आहे? असे दरेकर यांनी म्हटले आहे.
जरांगे छत्रपतींचे अनुयायी नाहीत -परिणय फुके
भाजप आमदार परिणय फुके यांनीही या प्रकरणी जरागेंवर हल्ला चढवला आहे. तसेच ते छत्रपती शिवाजी महाराजांचे अनुयायी नसल्याचाही आरोप केला आहे. आम्ही कुणाच्या आई बहिणीवर टीका करत नाही. ती महाराष्ट्राची परंपरा नाही. जरांगे अशी भाषा वापरत असतील, तर ते शिवाजी महाराजांचे अनुयायी नाहीत. आम्ही शिवाजी महाराजांना मानतो म्हणून आम्ही कंबरेखालचे बोलत नाही, नाही तर भाजपही याला चोख प्रत्युत्तर देऊ शकतो. मनोज जरांगे पाटील काही फार मोठे नेते नाहीत. त्यांची लोकप्रियता आता संपुष्टात आली आहे. त्यामुळे ते अशा भाषेत बोलत आहेत. ही जरांगे यांना ही शेवटची संधी आहे. त्यांनी पुन्हा अशी भाषा वापरली तर त्यांना जशास तसे प्रत्युत्तर दिले जाईल, असे फुके यांनी जरांगे यांना ठणकावून सांगितले.
मराठ्यांना ओबीसीतून आरक्षण देता येत नाही
मराठा समाजाला ओबीसीतून आरक्षण देता येत नसल्याचा दावाही परिणय फुके यांनी यावेळी केला. मनोज जरांगे यांनी संविधानाचा अभ्यास करावा. ते मागणी करत असलेले आरक्षण देता येत नाही. या अगोदरही मराठा समाजाचे मोठे आंदोलन झाले होते. तेव्हा पण मुख्यमंत्री यांनी ओबीसी आरक्षणाला धक्का लागणार नाही, असे आश्वासन दिले होते. आताही मुख्यमंत्री ओबीसी आरक्षणाला धक्का लागू देणार नाहीत असा आम्हाला ठाम विश्वास आहे, असेही फुके यावेळी बोलताना म्हणाले.
जरांगेंनी घेतले आपले शब्द मागे
दरम्यान, या प्रकरणी राजकारण वाढत असल्याचे पाहताच मनोज जरांगे यांनी आपण कुणालाही कोणतीही शिवीगाळ केली नसल्याचे स्पष्ट केले. मी शिवीगाळ केली नाही. पण चुकून तोंडातून काही निघाले असेल तर मी माझे शब्द मागे घेतो, असे त्यांनी आज पत्रकारांशी संवाद साधताना स्पष्ट् केले आहे.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
