Pune free chicken: पुणेकरांचा काही नेम नाही. पुणेकर कोणत्या गोष्टीचा कसा फायदा घेतील सांगता येत नाही.. एखादा उत्सव असो की सण. राजकीय फायद्यासाठी पुणेकर कशी भन्नाट आयडीया करतात याची प्रचिती पुन्हा एकदा आलीय. पुण्यातील रस्त्यावरची गर्दी बघून तुम्ही चक्रावाल. आज आखाडातला शेवटचा रविवार. त्यामुळे मुंबई असो की कोल्हापूर.. ठाणे असो की पुणे.. आज चिकन, मटणांच्या दुकानांत गर्दी तर होणारच. आखाडाची हिच संधी पुण्यातल्या एका दाम्पत्यानं हेरली आणि जनसंपर्क वाढवण्यासाठी अनोखी शक्कल लढवली. एक दोन नव्हे तर तब्बल 5 हजार किलो मोफत चिकनचं वाटप या दाम्पत्यानं केलं. जसा मोफत चिकन वाटपाचा बॅनर पुण्यात लागला. तशी पुणेकरांनी या चिकनशॉप बाहेर रांगा लावल्या. याबद्दल सविस्तर जाणून घेऊया.
जनसंपर्क वाढवण्यासाठी
पुण्यातील धानोरी भागात धनंजय जाधव फाउंडेशनने आखाडाच्या शेवटच्या रविवारी म्हणजेच 20 जुलै 2025 रोजी तब्बल 5,000 किलो मोफत चिकन वाटप करून एक अनोखे कॅम्पेन राबवण्यात आली. संपूर्ण राज्यात सध्या या मोहिमेची चर्चा सुरु आहे. हे कॅम्पेन स्थानिक नगरपालिका निवडणुकांच्या पार्श्वभूमीवर धनंजय आणि पूजा जाधव या दाम्पत्याने जनसंपर्क वाढवण्यासाठी आणि मतदारांपर्यंत पोहोचण्यासाठी आयोजित केली होती.
दुकानांसमोर लांबच लांब रांगा
याअंतर्गत धानोरी परिसरात चार वेगवेगळ्या दुकानांमधून हे चिकन वाटप करण्यात आले. गर्दी नियंत्रणात ठेवण्यासाठी आयोजकांनी ओळखपत्र (ID) दाखवण्याची अट घातली होती, परंतु काही ठिकाणी गर्दी अनियंत्रित झाल्याने ID तपासणी आणि नोंदणी प्रक्रिया सोडून देण्यात आली.आखाडाच्या सणाच्या निमित्ताने, ज्याला मराठी संस्कृतीत मांसाहारी जेवणाचा शेवटचा रविवार मानला जातो, या दाम्पत्याने सामाजिक आणि राजकीय प्रभाव वाढवण्यासाठी ही भन्नाट ऑफर आणली. स्थानिक निवडणुकांपूर्वी मतदारांना आकर्षित करण्याचा हा एक अनोखा प्रयत्न होता.
मोफत चिकन वाटपाचा बॅनर लागताच पुणेकरांनी दुकानांसमोर लांबच लांब रांगा लावल्या. काही ठिकाणी गर्दी इतकी वाढली की ती नियंत्रित करणे आव्हानात्मक ठरले होते.
पुणेकरांनी घरी जाऊन मटणावर ताव मारला
काहींनी या कॅम्पेनला “फुकट ते पौष्टीक” म्हणत हसतखेळत स्वीकारले, तर काहींनी याला निवडणुकीपूर्वी मतदारांना आकर्षित करण्याचा राजकीय डाव म्हणून टीकाही केली. काहीही असो, स्थानिकांनी या संधीचा पुरेपूर फायदा घेतला. विशेषतः आखाडाच्या सणाच्या पार्श्वभूमीवर, जिथे मांसाहारी जेवणाला विशेष महत्त्व आहे. तिथे अनेक पुणेकरांनी घरी जाऊन मटणावर ताव मारला.
स्थानिक राजकारणात चर्चेचा विषय
पुण्यात अशा मोफत वाटपाचे कॅम्पेन यापूर्वीही चर्चेत आले आहेत, जसे की लॉकडाऊन काळात अन्नधान्य वाटप करण्यात आलं होतं. मात्र, चिकन वाटपासारखी अनोखी आणि मोठ्या प्रमाणावरील कॅम्पेन पुणेकरांसाठी नवीन आणि लक्षवेधी ठरले.धनंजय जाधव फाउंडेशनने आखाडाच्या निमित्ताने राबवलेली हे कॅम्पेन पुण्यातील स्थानिक राजकारणात चर्चेचा विषय ठरली आहे. “आयडी दाखवा, चिकन मिळवा” ही टॅगलाईन आणि 5,000 किलो चिकन वाटपाने पुणेकरांचे लक्ष वेधले असले, तरी यामागील राजकीय हेतू आणि त्याचा मतदारांवर होणारा परिणाम यावर आगामी काळात अधिक चर्चा होण्याची शक्यता आहे.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
