तहसीलदार प्रशांत थोरातांवरील निलंबनाची कारवाई अन्यायकारक: राजपत्रित अधिकारी महासंघ, लोकप्रतिनिधीही संवाद साधताना गायन कलेचा वापर करत असल्याचा दावा – Hingoli News

.

या संदर्भात अधिकारी महासंघाचे राज्याध्यक्ष विनोद देसाई, सरचिटणीस समीर भाटकर, कोषाध्यक्ष नितीन काळे, दुर्गा महिला मंचाच्या अध्यक्षा सिध्दी संकपाळ यांनी मुख्यमंत्री देवेंद्र फडणवीस, महसूलमंत्री चंद्रशेखर बावनकुळे यांच्याकडे निवेदन सादर केले आहे.

उमरी (जि.नांदेड) येथील तहसील कार्यालयात तहसीलदार थोरात यांच्या बदलीनंतर अधिकारी व कर्मचाऱ्यांनी निरोप समारंभ आयोजित केला होता. यावेळी तहसीलदार थोरात यांनी आपल्या सहकार्यांना उद्देशून मनोगत व्यक्त करतांना मैत्रीपूर्ण गाणे गायले त्याच्या व्हिडीओ क्लिपवरून विभागीय आयुक्तांनी त्यांना निलंबित केले.

मात्र शासनाच्या विविध योजना जनतेपर्यंत पोहोचविणे यासह जीवाची पर्वा न करता गौणखनिज चोरी रोखणारा तहसीलदार महसूल प्रशासनातील महत्वाचा घटक आहे. प्रशासनात ३५ ते ४० टक्के जागा रिक्त असल्याची बाब वारंवार शासनाच्या निदर्शनास आणून दिली आहे. अपुऱ्या मनुष्यबळासह काम करतांना त्यांच्यासोबत सौदार्हपूर्ण व आपुलकीचे संबंध प्रस्थापित करणे, अतिकामामुळे कर्मचाऱ्यांमध्ये तणाव निर्माण होणार नाही याची खबरदारी कार्यालय प्रमुखाला घ्यावी लागते.

दरम्यान, केंद्र व राज्य शासनाने आय गॉट कर्मयोगी या प्रणालीद्वारे तणावमुक्ततेबाबत उपाय सुचविले आहेत. मंत्रालय मुख्यालयामध्येही टेक वारीच्या माध्मयातून तणावणुक्तीसह कार्यालयीन सुव्यवस्थेबाबत मार्गदर्शने झाली आहेत. या शिवाय राज्याचे विविध प्रशासन प्रमुख, मंत्री महोदय सार्वजनिक कार्यक्रमातून आपले सहकारी तसेच जनतेशी संवाद साधतांना गायन कलेचा प्रभावी वापर करीत असल्याचे अनेकवेळा दिसून येते.

मात्र तहसीलदार थोरात यांनी कौटूंबिक वातावरणात होत असलेल्या निरोप समारंभात मैत्रीचे गुणगान करणारे गीत गायले यावेळी त्यांनी आक्षेपार्ह हावभाव केल्याचा आरोप ठेऊन त्यांच्यावर निलंबनाची कारवाई केली. मात्र विभागीय आयुक्त कार्यालयाने प्रशासकीय कारवाईचा अवलंब न करता थेट निलंबनाची केलेली कारवाई अन्यायकारक असल्याचे निवेदनात म्हटले आहे. या निलंबन कारवाईचा फेर विचार होण्याची मागणीही करण्यात आली आहे.