शहरात एकीकडे टाेळ्यांवर, राजकारणाशी संबंधित टाेळ्यांच्या म्हाेरक्यांना पाेलिसांनी तुरुंगाची हवा दाखवली असताना अल्पवयीन गुन्हेगार, टवाळांचा मात्र हैदाेस वाढत आहे. त्यावरही नियंत्रणासाठी आता पाेलिसांकडून थेट त्यांच्या पालकांवरच कारवाई करण्यात येत आहे.
.
पाेलिस आयुक्त संदीप कर्णिक यांच्या क्लिन सिटी माेहिमेत सातपूरच्या लोंढे टोळीवर मोक्का कारवाई करत आयुक्तांनी बागूल, पवार, निकम या टोळ्यांवरही माेक्काचे संकेत दिले. या टोळ्यांमध्ये अल्पवयीन मुलांचा समावेश सापडल्यास संबंधित मुलाच्या पालकांवर कारवाई करण्यात येणार असल्याचे कर्णिक यांनी सांगितले. मुंबईनाका पोलिस ठाण्याच्या हद्दीत त्र्यंबकरोडवर तीन अल्पवयीन मुले सार्वजनिक ठिकाणी हुल्लडबाजी करत असल्याचा व्हिडिअो सूज्ञ नागरिकाने पोलिसांना पाठवला. व्हिडिअोच्या आधारे या तिघांना पाेलिसांनी ताब्यात घेत त्यांच्यावर कारवाई केली. यापुढे असा गुन्हा करणार नाही म्हणून मुलांच्या पालकांना पोलिस ठाण्यात बोलावून घेत त्यांच्यावरही कारवाई केली. पालकांनी ‘नाशिक जिल्हा कायद्याचा बालेकिल्ला’ असल्याचे मान्य करत मुलांकडून अशी चूक होणार नाही असे हमीपत्र दिले.
नागरिकांकडून कारवाईचे स्वागत
शहरात कर्णिक पॅटर्नचा बोलबाला सुरू आहे. कुठेही अनुचित प्रकार घडत असल्यास नागरिक त्याचा फोटो काढून पोलिसांना पाठवत आहे. विशेष म्हणजे पोलिसांकडून तत्काळ दखल घेत कारवाई होत असल्याने नागरिकांकडून पोलिसांच्या या कारवाईचे स्वागत होत आहे.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
