नितेश राणे आपल्या वक्तव्यांमुळे कायम चर्चेत असतात. आता तर त्यांनी थेट गर्भित इशारा दिला आहे. नारायण राणेंना अटक केल्याची व्हीडिओ क्लीप माझ्या मोबाईलमध्ये अजूनही सेव्ह आहे. त्याचा बदला घेतल्यानंतरच ती डिलीट करेन, असंही राणे यांनी म्हटलं आहे.
एखाद्या चित्रपटातल्या डायलॉगप्रमाणे मंत्री नितेश राणेंनी दिलेल्या या गर्भित इशा-याची तुफान चर्चा सुरू आहे. उद्धव ठाकरे सरकारमध्ये तत्कालीन केंद्रीय मंत्री नारायण राणेंना अटक करण्यात आली होती. त्याचाच बदला घेण्याची भाषा आता नितेश राणेंनी बोलून दाखवली. नारायण राणे यांना अटक केलेल्या क्षणाची क्लीप आजही माझ्या मोबाईलमध्ये सेव्ह आहे. त्याची परतफेड केल्याशिवाय क्लीप डिलीट करणार नाही, असा इशाराच नितेश राणे यांनी दिला आहे.
उद्धव ठाकरे मुख्यमंत्री असताना त्यांच्यावर नारायण राणे यांनी टीका केली होती. तत्कालीन मुख्यमंत्री उद्धव ठाकरेंच्या कानशिलात लगावण्याची आक्षेपार्ह भाषा नारायण राणेंनी वापरली होती. त्यानंतर नारायण राणेंना पोलिसांनी अटक केली होती. तत्कालीन केंद्रीय मंत्र्याला अशापद्धतीनं अटक झाल्यामुळे राज्याच्या राजकारणात मोठी खळबळ उडाली होती.
तर आपल्या वडिलांवर अन्याय झाल्याची नितेश राणेंची भावना आहे. त्यामुळे एक मुलगा म्हणून त्यांनी भावना व्यक्त केल्या असतील, असं शिवसेनेचे नेते आणि मंत्री गुलाबराव पाटलांनी म्हटलं आहे.
ठाकरे आणि राणेंमधील राजकीय वैर सर्वश्रुत आहे. ठाकरेंवर टीका करण्याची एकही संधी राणे सोडत नाहीत. आता ठाकरेंच्या कार्यकाळात झालेल्या अटकेची जुनी जखम राणेंच्या मनात ताजी असल्याचं त्यांनी दाखवून दिलं आहे. त्यामुळं येत्या काळात यावरून आणखी संघर्ष तापण्याची शक्यता आहे.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
