‘तुझं आयुष्य उध्वस्त करेन’, बेपत्ता पोलिसाच्या घरात सापडलेल्या चिठ्ठीतून धक्कादायक खुलासे, कॉल रेकॉर्डींगही आली समोर!

Indapur Crime: इंदापुरातून पोलीस हवालदार बेपत्ता झाल्याची घटना समोर आलीय. यामुळे पुणे ग्रामीण पोलीस दलात खळबळ उडाली. काल पहाटेपासून पोलीस हवालदार विष्णू सुभाष केमदारणे बेपत्ता झाले. याप्रकरणी इंदापूर पोलीस ठाण्यात तक्रार दाखल करण्यात आली होती.  दरम्यान केमदारणे यांच्या कुटुंबीयांना घरात एक चिठ्ठी सापडली. या चिठ्ठीत पोलीस निरीक्षक सूर्यकांत कोकणे यांनी जीवे मारण्याची धमकी दिल्याचे म्हटले गेलंय.काय आहे हा प्रकार? सविस्तर जाणून घेऊया. ॉ

विष्णू केमदारणे बेपत्ता

पुणे ग्रामीण पोलीस दलात एक खळबळजनक घटना घडली. पुणे ग्रामीण पोलीस दलातील कर्मचारी पोलीस हवालदार विष्णू केमदारणे हे काल सकाळीपासून इंदापूर पोलीस ठाण्याच्या शासकीय वसाहतीतून बेपत्ता झाले आहेत. दरम्यान केमदारणे यांनी लिहिलेली एक चिठ्ठी समोर आली असून या चिठ्ठीतून त्यांनी इंदापूर पोलीस ठाण्याचे पोलीस निरीक्षक सूर्यकांत कोकणे यांच्यासह अन्य दोन पोलीस कर्मचाऱ्यांवर गंभीर आरोप करण्यात आले आहेत.

जीवे मारण्याची धमकी 

मागील 2 महिन्यांपासून पोलीस निरीक्षक सूर्यकांत कोकणे यांनी पोलीस हवालदार रासकर आणि पोलीस कॉन्स्टेबल सूर्यवंशी यांच्या सांगण्यावरून जीवे मारण्याची धमकी दिली आहे. तुझी नोकरी व यापुढील आयुष्य हे उध्वस्त करून टाकेन, अशी भाषा वापरून मला जीवे मारण्याची धमकी दिली असल्याचे या चिठ्ठीत लिहिलंय.विष्णू केमदारणे यांनी त्यांच्या पत्नीच्या मोबाईलवर एक कॉल रेकॉर्डिंग ऑडिओ देखील पाठवलाय. माझ्या या अवस्थेला होणाऱ्या परिणामांना पोलीस निरीक्षक सूर्यकांत कोकणे हेच जबाबदार आहेत असंही या चिठ्ठीमध्ये लिहिण्यात आलंय.

 इंदापूर पोलीस ठाण्यासमोर आत्महत्या करण्याचा इशारा

या संपूर्ण खळबळजनक घटनेनंतर इंदापूर पोलीस ठाण्यात विष्णू केमदारणे यांच्या पत्नी प्रियंका केमदारणे यांनी आपले पती हरवल्याची तक्रार देखील दाखल केली असून पोलीस निरीक्षक सूर्यकांत कोकणे यांना सवाल उपस्थित केला आहे. खात्या व्यतिरिक्त तुम्ही माझ्या पतीला वैयक्तिक धमकी का देताय, माझ्या पतीला न्याय मिळाला पाहिजे अन्यथा मी माझ्या मुलाबाळांसह इंदापूर पोलीस ठाण्यासमोर आत्महत्या करेन असा इशारा ही दिलाय. या संदर्भात उपविभागीय पोलीस अधिकारी सुदर्शन राठोड यांनी प्रतिक्रिया दिली असून संबंधित पोलीस कर्मचाऱ्यांच्या पत्नीची तक्रार दाखल करून घेतली.

 पोलीस पथक तयार 

पोलीस खात्याकडून या संबंधित कर्मचाऱ्यांचा शोध घेतला जात असून त्या कामी पोलीस पथक तयार करण्यात आले आहे. चिठ्ठीमध्ये केमदारणे यांनी जे आरोप केले आहेत त्या आरोपांची वरिष्ठ कार्यालयाकडून चौकशी केली जाईल आणि त्या पद्धतीचा अहवाल कार्यालयाला पाठवला जाईल अस उपविभागीय पोलीस अधिकाऱ्यांनी म्हटलं आहे.