तुमच्या स्मार्टफोनवर सायबर गुन्हेगारांचा डोळा, मोबाईल चोरून ‘असा’ मारला जातोय बँक खात्यावर डल्ला!

Nashik Cyber Crime: तुम्ही मोबाईल हॅक करून पैसे चोरण्याची घटना ऐकली असेल किंवा तुमचा ओटीपी मागून पैसे अपहार केल्याची घटना देखील वाचली असेल.मात्र नाशिकमध्ये एक वेगळीच घटना घडली आहे.नाशिक मध्ये राहणा-या एका कंत्राटदाराचा मोबाईल चोरून त्याच्या अकाउंट वरून तब्बल साडेतीन कोटी रुपये चोरल्याची घटना घडली आहे.

आर्थिक फसवणुकीतून वाचायचं असेल तर तुम्हाला कोणताही फोन आला किंवा मेसेज आला किंवा कुणी ओटीपी मागितला तर त्यावर विश्वास ठेवू नका असं आवाहन अनेकदा करण्यात आलंय. मात्र आता तुम्हाला तुमचा स्मार्टफोनही सांभाळून ठेवावा लागणार आहे. कारण सायबर गुन्हेगारांचा आता तुमच्या फोनवर डोळा आहे. मोबाईल हॅक करून नाही तर मोबाईल चोरून या सायबर भामट्यांनी नाशिकमधील एका कंत्राटदाराला साडेतीन कोटींचा गंडा घातलाय. कुरिअर देण्यासाठी ओटीपी पाहण्याच्या बहाण्याने  हेल्मेट घातलेले दोन जण कंत्राटदाराजवळ आले. आणि त्याचा फोन घेऊन पसार झाले. आणि अवघ्या काही तासात कंत्राटदाराचं अकाऊंट रिकामं झालं.

सायबर पोलिसांच्या मदतीने कंत्राटदाराच्या बँक खात्यावरील सर्व व्यवहार तत्काळ थांबवण्यात आले. तपासामध्ये कंत्राटदाराच्या खात्यावरून धुळ्यातील एका व्यक्तीच्या बँक खात्यात पैसे जमा झाल्याची माहिती मिळाली धुळे पोलिसांच्या मदतीने खातेधारकाला शोधण्यात आलं. 48 तासात कंत्राटदाराला त्याचे पैसे परत मिळाले. ज्या खातेधारकाच्या खात्यावर पैसे जमा झाले त्याने हे पैसे जमीन व्यवहाराचे असल्याचं सांगितलं. त्यामुळे त्याच्यासोबत व्यवहार करणा-या व्यक्तींचा शोध घेतला जातोय.

अद्याप हे सायबर भामटे पोलिसांच्या हाती लागू शकले नाहीयेत. 
आपले सगळे पैसे परत मिळाल्याने कंत्राटदाराने सुटकेचा निश्वास सोडला असला तरी या प्रकारामुळे नाशिकमध्ये खळबळ उडालीये.