Kunal Kamra Post: स्टँडअप कॉमेडियन कुणाल कामराने उपमुख्यमंत्री एकनाथ शिंदेंवर उपहासात्मक पॅरडी केली. यानंतर शिवसैनिकांमध्ये संतापाची लाट उसळली. मुंबई पोलीस कुणाल कामराला शोधण्यासाठी त्याच्या घरी गेले. पण आपण तिथे मागच्या 10 वर्षांपासून राहतच नसल्याचे त्याने सांगितले. आता कुणाल कामराने आणखी एक पोस्ट लिहून महाराष्ट्र सरकार आणि पोलिसांचे लक्ष वेधून घेतले आहे. त्याच्या या पोस्टमुळे पुन्हा खळबळ उडाली आहे.
काय म्हणाला कुणाल?
How to kill an Artist “Democratically” pic.twitter.com/9ESc9MZfWr
— Kunal Kamra (@kunalkamra88) April 1, 2025
कलाकाराला कसं मारायचं? स्टेप बाय स्टेप गाइड अशा शिर्षकाखाली कुणाल कामराने एक पोस्ट लिहीली आहे. यात त्याने 5 स्टेप्स सांगितल्या आहेत. सर्वप्रथम कलाकारासोबत काम करणाऱ्या ब्राण्ड्सना थांबवायचं. कलाकाराचे खासगी आणि कॉर्पोरेट कार्यक्रम संपेपर्यंत असं करत राहायचं. मग कलाकाराचा कार्यक्रम ठेवण्याची रिस्क कोणी घेणार नाही. कलाकाराची सारी दारं बंद करण्यासाठी छोट्यातली छोटी पावलं उचलायची. कलाकाराच्या प्रेक्षकांना समन्स पाठवायचे. कला गुन्ह्यामध्ये बदलेल असे प्रश्न विचारायचे. यानंतर कलाकाराकडे फक्त 2 पर्याय उरतात. स्वत:चा आत्मसन्मान विकून पोपटपंची करायची किंवा शांत राहायचं. हे प्लेबूक नाहीय. हे राजकीय हत्यार आहे. शांत करण्याची मशीन आहे.
नेमकं काय प्रकरण?
स्टँडअप कॉमेडियन कुणाल कामरने उपमुख्यमंत्री एकनाथ शिंदेंवर उपहासात्मकपणे टीका केली होती. महाराष्ट्रातील राजकीय घडामोडी, शिवसेना फुटीवर कुणाल कामराने गाण्याच्या माध्यमातून भाष्य केलं आहे. यानंतर शिवसैनिक संतापले आणि त्यांनी कामराचा शो झाला त्या सेटची तोडफोड केली. यानंतर वाद पेटला आणि सत्ताधारी आमदारांकडून कुणाल कामराला अटक करण्याची मागणी केली जातेय. मुख्यमंत्री देवेंद्र फडणवीस यांनीदेखील याची दखल घेतली असून कारवाईचा इशारा दिला आहे. त्यातच आता उद्धव ठाकरे यांनी यावर भाष्य केलं आहे.
कामरा नेमकं काय म्हणाला होता?
“महाराष्ट्राच्या निवडणुकीत यांनी काय केलं आहे पाहा. शिवसेना भाजपामधून बाहेर आली. मग शिवसेना शिवसेनेतून बाहेर आली. राष्ट्रवादी राष्ट्रवादीमधून बाहेर आली. एका मतदाराला 9 बटणं दिली. सगळेच गोंधळून गेले. मुंबईतील ठाणे जिल्ह्यातील एकाने सुरु केलं होतं,” असं म्हणत कुणालने पुढे ‘भोली सी सुरत, आँखो मे मस्ती’ गाण्याच्या चालीवर एक गाणं सादर केलं. यामध्ये त्याने ठाण्यातील रिक्षा, चेहऱ्यावर दाढी, डोळ्यावर चष्मा असा उल्लेख गाण्यामधून केला आहे. तसेच पुढे बोलताना, “एक झलक दाखवून कधी गुवहाटीमध्ये लपले,” असंही म्हटलं आहे. शिवसेनेत फूट पडल्यानंतर एकनाथ शिंदे बंडखोर आमदारांबरोबर काही काळ गुवहाटीमध्ये वास्तव्यास असल्याचा संदर्भ यामधून देण्याचा प्रयत्न कामराने केला. याच गाण्याच्या चालीत कामराने, “माझ्या नजरेतून पाहिलं तर ती व्यक्ती गद्दार आहे,” असंही म्हटलं आहे. “मंत्री नाही तर ती व्यक्ती पक्ष बदलणारी आहे, अजून काय सांगू?” असंही कामराने म्हटलंय. “ज्या थाळीत खाल्लं त्याच थाळीत त्यांनी छिद्र केलं,” असंही कामराने या गाण्यात म्हटलं आहे. “राजकीय परिवारवाद संपवायचा होता म्हणून यांनी बाप चोरला असं यांचं राजकारण आहे,” असं कामराने गाण्यात म्हटलं आहे.
कोट्यावधी रुपयांची मदत
कुणाल कामराला देशविदेशातून वाढता पाठिंबा मिळताना दिसत आहे. एकीकडे कुणाल कामरावर माफीसाठी दबाव टाकला जात आहे. याचवेळी कुणालच्या कायदेशीर लढ्यासाठी जगभरातून आर्थिक मदतीचा ओघ सुरू झाला असून दोन दिवसांत त्याच्या खात्यात तब्बल चार कोटी रुपयांहून अधिक रक्कम जमा झाली आहे. कुणालने महाराष्ट्रातील फोडाफोडीच्या राजकारणावर भाष्य केले, अशी उत्स्फूर्त प्रतिक्रिया महाराष्ट्र- भारतासह इतर देशांतील चाहतेही व्यक्त करीत आहेत. याचवेळी कुणालचा कायदेशीर लढा बळकट करण्यासाठी जगभरातील चाहत्यांकडून आर्थिक मदतीचा तुफान ओघ सुरू झाला आहे. या मदतीच्या रूपात दोन दिवसांत कुणालच्या खात्यात तब्बल 4 कोटी 7 लाख 80 हजार रुपये जमा झाल्याची माहिती समोर आली आहे.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
