दिशा सालियन प्रकरणात आरोपींचे दोन गट: एकात आदित्य तर दुसऱ्यात उद्धव ठाकरे, नीलेश ओझांचा आरोप; गुन्हा क्रमांक देण्याची मागणी – Mumbai News

.

दिशा सालियनच्या वडिलांचे वकील अ‍ॅडव्होकेट नीलेश सी. ओझा म्हणाले की, “आम्ही आधी सादर केलेल्या आमच्या तक्रारीवर चर्चा करण्यासाठी जॉइंट सीपी लक्ष्मी गौतम यांची भेट घेतली. सरकारने अलीकडेच ते रेकॉर्डवर मान्य केल्यामुळे, ही तक्रार अधिकृतपणे नोंदवावी अशी आमची विनंती होती. आम्ही विलंब न करता त्याला गुन्हा क्रमांक देण्याची विनंती केली आहे. आम्ही मागणी केली की याचिकाकर्ता सतीश सालियन आणि त्यांचे कुटुंब, वकील आणि प्रमुख साक्षीदार यांना पोलिस संरक्षण देण्यात यावे.

आरोपींचे दोन गट – एकात आदित्य तर दुसऱ्यात उद्धव ठाकरे

हे प्रकरण 15 महिन्यांपासून रखडलेले आहे. महत्त्वाचे तथ्य स्थापित करण्यासाठी आम्ही गुन्ह्याच्या ठिकाणाची त्वरित सीन रिकरिंग करण्याची मागणी केली आहे. आरोपींचे दोन गट आहेत – पहिला, सामूहिक बलात्कार आणि हत्येचा थेट आरोप असलेले आदित्य ठाकरे, सूरज पंचोली, दिनो मोरिया आणि आदित्य ठाकरे यांचे अंगरक्षक यांचा आहे. तर दुसरा गट प्ररकण लपविण्याचा आरोप असलेले आरोपी आहेत. यात परम बीर सिंग, सचिन वाझे आणि उद्धव ठाकरे यांचा संबंध आहे.

रिया चक्रवर्ती कटाचा एक भाग

या प्रकरणाशी संबंधित किमान दहा जणांचा गूढ पणे मृत्यू झाला आहे. काहींना आत्महत्या म्हणून लेबल केले आहे, तर काहींना अपघात म्हणून. रिया चक्रवर्ती कटाचा एक भाग आहे. 8 जून रोजी, ती अचानक सुशांत सिंग राजपूतच्या घरातून निघून गेली, त्याचा फोन ब्लॉक केला आणि नंतर, सुशांत मृतावस्थेत आढळला. जेव्हा नार्कोटिक्स कंट्रोल ब्युरो (एनसीबी) ने रियाला अटक केली तेव्हा त्यांनी तिच्या वडिलांच्या घरातून एक लपवलेला फोन जप्त केला. फॉरेन्सिक तपासणीत डिलीट केलेले मेसेज परत मिळाले, ज्यात आदित्य ठाकरे यांच्याशी झालेल्या मेसेज चाही समावेश होता, ज्यामुळे खोलवरचे कट उघड झाल्याचा दावा देखील त्यांनी केला आहे.

दिशा सालियन ही सुशांत सिंग राजपूतची माजी व्यवस्थापक होती

दिशा सालियन दिवंगत अभिनेता सुशांत सिंग राजपूतची माजी व्यवस्थापक होती. 8 जून 2020 रोजी मुंबईतील मालाड परिसरात 14व्या मजल्यावरून पडून दिशाचा मृत्यू झाला. पोलिसांनी याला आत्महत्या म्हटले होते. मात्र, दिशाची सामूहिक बलात्कारानंतर हत्या करण्यात आली, राजकीय दबावामुळे हे प्रकरण दडपण्यात आल्याचा आरोप तीचे वडील सतीश सालियन यांनी केला आहे.

20 मार्च 2024 रोजी दिशाच्या वडिलांनी आपल्या मुलीच्या मृत्यूच्या नव्या तपासासाठी मुंबई उच्च न्यायालयात याचिका दाखल केली. याप्रकरणी त्यांनी ठाकरे गटाचे नेते आदित्य ठाकरे, माजी अभिनेत्री रिया चक्रवर्ती आणि इतरांना आरोपी बनवून अटक करण्याची मागणी केली आहे. याशिवाय उच्च न्यायालयाच्या देखरेखीखाली सीबीआय तपास करण्याची मागणीही करण्यात आली आहे.

सतीश यांनी याचिकेत म्हटले आहे की, ‘माझ्या मुलीने आत्महत्या केलेली नाही, तिची हत्या करण्यात आली आहे. एका बॉलिवूड पार्टीमध्ये, दिशाने आदित्य ठाकरे, सूरज पांचोली आणि इतर काहींच्या उपस्थितीत एका अल्पवयीन मुलीवर बलात्कार झाल्याचे पाहिले. यामुळे तिच्यावरही आधी सामूहिक बलात्कार आणि नंतर खून करण्यात आला. हत्येनंतर दिशाचा मृतदेह मालाड मधील एका इमारतीजवळ आणून संपूर्ण प्रकरण आत्महत्या असल्याचे घोषित करण्यात आल्याचा दावा त्यांनी केला आहे.