काँग्रेस प्रदेशाध्यक्ष हर्षवर्धन सपकाळ यांनी शुक्रवारी मुख्यमंत्री देवेंद्र फडणवीस यांच्यावर कडाडून हल्ला चढवला. देवेंद्र फडणवीस हे राज्यातील सर्वात मोठा आका आहेत. ते गुन्हेगारी प्रवृत्तीला खतपाणी घालण्याचे काम करतात, असे ते म्हणालेत. यावेळी त्यांनी
.
हर्षवर्धन सपकाळ यांनी शुक्रवारी पत्रकारांशी संवाद साधला. त्यात त्यांनी राज्यातील ढासळलेली कायदा सुव्यवस्था, फलटण महिला डॉक्टर आत्महत्या तथा या प्रकरणात मुख्यमंत्र्यांनी भाजप नेते रणजितसिंह निंबाळकर यांना दिलेली कथित क्लीनचिट, पवईतील अपहरण कांड आदी विविध मुद्यांवरून मुख्यमंत्री देवेंद्र फडणवीस यांच्यावर हल्ला चढवला. ते म्हणाले, देवेंद्र फडणवीस हे राज्यातील सर्वात मोठे आका आहेत. ते गुन्हेगारी प्रवृत्तीला खतपाणी घालण्याचे काम करतात. महाराष्ट्राला पूर्णवेळ गृहमंत्री नसल्यामुळे ते एखाद्या आकासारखे वागत आहेत. यामुळे राज्यात कायदा सुव्यवस्थेचा प्रश्न निर्माण झाला आहे. त्यामुळे पूर्णवेळ गृहमंत्री मिळावा अशी काँग्रेसची मागणी आहे.
रोहित आर्याचे अनेकांसोबत फोटो
हर्षवर्धन सपकाळ यांनी यावेळी रोहित आर्या यांच्या एन्काऊंटरवरही प्रश्नचिन्ह उपस्थित केले. पवईतील अपहरणकांडात नेमके काय झाले? राज्यात ठेकेदारांचाही छळ केला जात आहे. पैसे मिळत नाही म्हणून रोहित आर्याने चुकीचे कृत्य केले. त्याचे समर्थन होऊ शकत नाही. पण त्याने पुढे काही बोलू नये म्हणून कुणी महाराष्ट्र पोलिसांना त्याला गोळी घालण्यास तर सांगितले नाही ना? कारण, त्याचे अनेकांसोबत फोटो होते.
फलटणच्या आकाला विशेष सुविधा
फलटण उपजिल्हा रुग्णालयातील एका डॉक्टर महिलेने आत्महत्या केली. पण तिला आत्महत्या म्हणायचे का? याला संपूर्ण सरकार जबाबदार आहे. फलटणच्या आकाला महाराष्ट्र पोलिसांनी विशेष सुविधा दिली आहे. मुख्यमंत्र्यांनी फलटणला जाऊन महिला डॉक्टरच्या या प्रकरणातील एक संशयित असणाऱ्या रणजितसिंह निंबाळकर यांना क्लीनचिट दिली. त्यानंतर तिथे फडणवीस पुरस्कृत घटना होत आहेत, असे सपकाळ म्हणाले.
सपकाळ यांच्यावर पाळत ठेवण्याचा आरोप
हर्षवर्धन सपकाळ यांनी यावेळी भाजपवर आपल्यावर पाळत ठेवण्याचाही आरोप केला. ते म्हणाले, मी एक सामाजिक व राजकीय कार्यकर्ता आहे. मी सर्वोदय आश्रमात राहतो. तेथील शिस्त पाळतो. ते माझे घर आहे. याऊलट भाजप हा दाराच्या फटीतून पाहणारा पक्ष आहे. आज तिसऱ्यांदा ही घटना घडली. मी याविषयी पोलिसांना विचारले की, तुम्हाला मुख्यमंत्र्यानी माझ्यावर पाळत ठेवण्यास सांगितले का? त्यावर त्यांनी मला तुम्ही प्रेस घेणार आहात का? अशी विचारणा केली. हे पोलिस माझ्या खोलित काय आहे हे पाहत होते. हा सर्व हेरगिरीचा प्रकार आहे.
भाजप सरकार व पोलिस केवळ पेगाससपर्यंत थांबले नाही. ते आता लोकांच्या खोली व बेडरूमपर्यंत पोहोचले आहेत. आलेला व्यक्ती एकटा होता. साध्या वेशातील पोलिस होता. त्याच्या बोलण्यातून ते दिसत होते, असेही सपकाळ यावेळी सरकारला आरोपीच्या पिंजऱ्यात उभे करताना म्हणाले.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
