नांदेडमध्ये शिंदेसेनेच्या आमदाराचा पालकमंत्र्याच्या विरोधात निषेधाचा इशारा: तांडावस्तीचा निधी विरोधकांनाच वाटप केल्याचा आरोप – Nanded News

.

नांदेड जिल्ह्यात तांडा वस्ती सुधार योजने अंतर्गत विविध गावांसाठी १९ कोटी रुपयांचा निधी मंजूर करण्यात आला आहे. इतर मागास व बहुजन कल्याण विभागाने या कामांना मंजूरी दिली आहे. याबाबत शासन निर्णय जारी झाल्यानंतर स्थानिक आमदारांनी तिव्र आक्षेप नोंदविला.

नांदेड जिल्ह्यातील हदगावचे शिंदेसेनेचे आमदार बाबुराव कदम कोहळीकर यांनी थेट पालकमंत्री अतुल सावे यांना गुरुवारी ता. १७ पत्र सादर केले आहे. तांडावस्ती सुधार योजनेमध्ये स्थानिक प्रतिनिधी या नात्याने निधी मागणीबाबत अनेक पत्रव्यवहार करुनही आपण त्यास मंजुरी न देता पक्ष विरोधी लोकांना निधी वाटप करून एक प्रकारे लोकप्रतिनिधींचा अवमान करीत आहात. त्यामुळे या गंभीर प्रकरणी आपल्या आगामी दौऱ्यात मी असंख्य कार्यक्तर्यांसह निषेध करणार असून याची गंभीर नोंद घ्यावी असा इशाराच या पत्राद्वारे दिला आहे.

या शिवाय भाजपाचे आमदार डॉ. तुषार राठोड यांनी थेट मुख्यमंत्री देवेंद्र फडणवीस यांच्याकडे पत्र दिले आहे. मुखेड मतदार संघात ८२ कामांसाठी ७.२५ कोटी रुपये निधी मंजूर केला. मात्र माझी कोणत्याही प्रकारची शिफारस मागितली नसून मी सुचविलेल्या एकाही कामाचा समावेश न करता अनावश्‍यक कामे मंजूुर करण्यात आल्याचा आरोप केला आहे. त्यांनतर मुख्यमंत्री फडणवीस यांनी आमदार डॉ. राठोड यांच्या पत्रानुसार कामांना स्थगिती देऊन अहवाल सादर करण्याचे आदेश दिले आहेत.

दरम्यान, मंत्र्यांना अंधारात ठेऊन खाजगी सचिवांनीच कंत्राटदारांना खूष करण्यासाठी हा प्रकार केल्याची चर्चाही कंत्राटदार लॉबीमध्ये सुरु झाली आहे. त्यामुळे आता खाजगी सचिवच चर्चेच्या रडारवर आले आहेत.

बोरवाडी ग्रामपंचायतीवर मेहेरनजर

शासन निर्णयानुसार एका ग्रामपंचायतीला २५ लाख रुपयांचा निधी देता येतो. मात्र नांदेड जिल्ह्यातील बोरवाडी ग्रामपंचायतीला तब्बल १.७० कोटी रुपयांचा निधी वाटप केला आहे. त्यामुळे हा निधी कोणत्या निकषावर वाटप केला याची चर्चा सुरु झाली आहे.

या संदर्भात नांदेडचे पालकमंत्री अतुल सावे यांच्याशी भ्रमणध्वनीवरून संपर्क साधला असता त्यांच्याशी संपर्क होऊ शकला नाही.त्यामुळे त्यांची प्रतिक्रिया मिळू शकली नाही.