अखिल भारतीय मराठी नाट्य परिषदेतर्फे अमरावतीत नाट्य परिषद करंडक स्पर्धा आयोजित करण्यात आली. हव्याप्र मंडळाच्या सोमेश्वर पुसतकर सभागृहात ही स्पर्धा पार पडली. स्पर्धेत १३ एकांकिकांच्या माध्यमातून १६५ हून अधिक नाट्यकर्मींनी सहभाग घेतला.
.
शंभराव्या मराठी नाट्य संमेलनानिमित्त ही स्पर्धा आयोजित करण्यात आली. नाट्य परिषदेचे मध्यवर्ती शाखेचे अध्यक्ष प्रशांत दामले यांच्या संकल्पनेतून ही स्पर्धा भरवण्यात आली. स्पर्धा शनिवार-रविवार असे दोन दिवस चालली.
स्पर्धेत रेणुका पुराणिक यांची ‘रानभूल’, विनोद सुरोशे यांची ‘किसनुमा’, हिमांशू इहारे यांची ‘वेळ’ यांसह एकूण १३ एकांकिका सादर करण्यात आल्या. नागपूरचे देवेंद्र दोडके आणि सोलापूरचे सुधीर गुरव यांनी स्पर्धेचे परीक्षण केले.
महत्त्वाची बाब म्हणजे ही स्पर्धा एकाच वेळी महाराष्ट्रातील १९ केंद्रांवर घेण्यात आली. राज्यभरात एकूण २५५ एकांकिका सादर झाल्या. या स्पर्धेच्या माध्यमातून ३ हजारांहून अधिक कलावंतांना आपली कला सादर करण्याची संधी मिळाली.
स्पर्धेचे उद्घाटन अमरावती शाखेचे अध्यक्ष ॲड. चंद्रशेखर डोरले आणि मुंबई नियामक मंडळाचे सदस्य ॲड. प्रशांत देशपांडे यांच्या हस्ते करण्यात आले. ॲड. श्रद्धा पाटेकर आणि अभिजीत देशमुख यांनी समन्वयक म्हणून काम पाहिले. येत्या काही दिवसांत स्पर्धेचा निकाल जाहीर होणार आहे.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
