नाशिकच्या आंबेडकरवाडी येथे दोन सख्ख्या भावांची निर्घृण हत्या करण्यात आली आहे. दोघांवरही धारदार शस्त्राने हल्ला करत त्यांची हत्या करण्यात आली. प्रशांत जाधव,उमेश उर्फ मुन्ना जाधव अशी मृतांची नावे आहेत. या प्रकरणी पोलिसांनी गुन्हा दाखल केला आहे.
.
रंगपंचमीच्या रात्री साडे अकरा वाजेच्या सुमारास हल्लेखोरांनी धारदार शस्त्राने वार करत दोघा भावांचा सार्वजनिक शौचालयासमोर निर्घृण खून केला. मृत उमेश जाधव हे राष्ट्रवादी काँग्रेसच्या अजित पवार गटाचे शहर उपाध्यक्ष असल्याचे समोर आले आहे.
नेमके काय घडलं?
उमेश आणि त्याचा सख्खा भाऊ प्रशांत हे दोघेही बुधवारी रात्री साडे अकराच्या सुमारास पुणे-नाशिक महामार्गालगत असणाऱ्या आंबेडकरवाडीतील एका सार्वजनिक शौचालयासमोरून जात होते. यावेळी शौचालयाजवळ दबा धरून बसलेल्या हल्लेखोरांनी दोघांवर हल्ला केला. हल्लेखोरांनी दोघांवर कोयत्याने सपासप वार केला.
अचानक झालेल्या या हल्ल्यामुळे दोघांना प्रतिकारही करता आला नाही. कोयत्याच्या वारामुळे दोघेही जाग्यावरच कोसळले. यानंतर हल्लेखोरांनी घटनास्थळावरून पळ काढला. ही बाब परिसरातील तरुणांच्या लक्षात येताच त्यांनी दोघांनाही तातडीने शासकीय जिल्हा रुग्णालयात दाखल केले, मात्र डॉक्टरांनी त्यांना मृत घोषित केले.
पूर्ववैमनस्यातून खून झाल्याचा अंदाज
दरम्यान दोघांची हत्या केल्यानंतर हल्लेखोर पसार झाले आहेत. हत्यचे कारण अद्याप अस्पष्ट आहे. दुहेरी हत्याकांडामुळे परिसरात भीतीच वातावरण आहे. पोलिसांनी या खुनाच्या तपासाकरिता 4 टीम तयार केल्या आहेत. पोलिसांचा काही व्यक्तींवर संशय असून लवकर आरोपींना ताब्यात घेतले जातील,असे पोलिसांनी सांगितले आहे. प्रशांत आणि उमेश यांचा परिसरात जनसंपर्क असल्याने रात्री उशिरापर्यंत जमावाने प्रचंड गर्दी केली होती. दुहेरी खूनप्रकरणी 5 जणांना पोलिसांनी ताब्यात घेतले आहे. पूर्ववैमनस्यातून खून झाल्याचा अंदाज पोलिसांनी वर्तवला आहे. खून करण्याआधी काय घडले होते? याचा पोलीस तपास करत आहेत
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
