Pankaja Munde Beed Banner : भाजप नेत्या आणि मंत्री पंकजा मुंडे यांचा आज 45 वा वाढदिवस असून त्यानिमित्ताने बीड जिल्ह्यात विविध ठिकाणी जोरदार बॅनरबाजी पाहायला मिळत आहे. मात्र, या बॅनर्सवर एक विशेष बाब लक्षवेधी ठरत आहे. ती म्हणजे पंकजा मुंडे यांचे बंधू धनंजय मुंडे यांचा फोटो बॅनर्सवरून पूर्णपणे वगळण्यात आला आहे. यामुळे सध्या चर्चांना उधाण आलं आहे.
सध्या दोघेही पंकजा आणि धनंजय मुंडे महायुतीच्या माध्यमातून एकाच बाजूने कार्यरत आहेत. पूर्वीच्या राजकीय संघर्षांनंतर त्यांचं एकत्र येणं महाराष्ट्राच्या राजकारणात एक मोठी घडामोड मानली गेली होती. दोघांचा एकमेकांवरील जिव्हाळा देखील अनेक सार्वजनिक व्यासपीठांवर दिसून आला होता. मात्र, सरपंच देशमुख हत्या प्रकरण आणि महादेव मुंडे खून प्रकरणात धनंजय मुंडेंचे नाव चर्चेत आल्यानंतर त्यांच्यावरील टीकेचा जोर वाढला. याच पार्श्वभूमीवर महायुतीच्या स्थानिक पदाधिकाऱ्यांनी आणि पंकजा मुंडे यांच्या समर्थकांनीच आपल्या नेत्याच्या वाढदिवशी बंधू धनंजय मुंडे यांना बॅनरवरून दूर ठेवण्याचा निर्णय घेतल्याचं दिसत आहे.
पंकजा मुंडेंच्या बॅनर्सवरून सुरेश धस गायब
दरम्यान, बीडमध्येच नव्हे तर आष्टी तालुक्यातही भाजपचे स्थानिक पदाधिकारी आणि पंकजा मुंडेंचे समर्थकांनी पंकजा मुंडे यांच्या वाढदिवसानिमित्त मोठ्या प्रमाणावर फलक लावले आहेत. मात्र, येथेही एक आश्चर्यकारक बाब म्हणजे स्थानिक भाजप आमदार सुरेश धस यांचाही फोटो या बॅनर्सवरून वगळण्यात आला आहे. सुरेध धस हे सध्या पंकजा मुंडे यांच्या गटाशी फारसे संबंध न ठेवणाऱ्या नेत्यांपैकी एक मानले जातात.
या घटनांमुळे संपूर्ण बीड जिल्ह्यात राजकीय चर्चेला उधाण आले असून महायुतीतील अंतर्गत कुरबुरी, गटबाजी आणि नेतृत्वांमधील अदृश्य ताणतणाव पुन्हा एकदा उघड होऊ लागला आहे. राजकीय निरीक्षकांच्या मते, हा प्रकार केवळ एक वाढदिवसाच्या बॅनरपुरता मर्यादित नसून आगामी काळात या अंतर्गत मतभेदांचे पडसाद स्थानिक स्वराज्य संस्थांच्या निवडणुकीत किंवा आगामी विधानसभा निवडणुकीतही उमटू शकतात असं म्हटलं जात आहे.
चर्चांना उधाण
सध्या तरी पंकजा मुंडे यांच्या वाढदिवसानिमित्त त्यांच्या कार्यकर्त्यांमध्ये मोठा उत्साह आहे. मात्र या बॅनरविषयक घटनांमुळे त्यांच्या राजकीय परिसरात चर्चा आणि उलटसुलट प्रतिक्रिया नक्कीच तापल्या आहेत.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
