पंढरपुरात पूर स्थिती निर्माण होण्याची शक्यता: चंद्रभागेत 1 लाखाहून अधिक विसर्गाने पाणी, आपत्कालीन यंत्रणा अद्यापही निष्क्रीय – Solapur News

.

पुणे आणि सातारा परिसरात सुरू असलेल्या मुसळधार पावसामुळे धरणांतून मोठ्या प्रमाणावर विसर्ग सुरू झाला आहे. उजनी धरणातून सध्या तब्बल 71,600 क्युसेक्स, तर वीर धरणातून 32,663 क्युसेक्स वेगाने पाणी सोडले जात आहे. त्यामुळे चंद्रभागा नदीत प्रचंड जलप्रवाह पोहोचू लागला असून, नदीची पाणी पातळी झपाट्याने वाढत आहे. अंदाजानुसार, आज रात्रीपर्यंत चंद्रभागेच्या पात्रात जवळपास एक लाख क्युसेक्स विसर्ग पोहोचणार आहे.

या पुरामुळे चंद्रभागेतील मंदिरे, वाळवंट आणि आजूबाजूचा परिसर आधीच पाण्याखाली गेला आहे. सध्या श्रावण महिना सुरू असल्याने पंढरपूरात भाविकांची मोठ्या प्रमाणात गर्दी आहे. भाविक मोठ्या श्रद्धेने स्नानासाठी चंद्रभागेत उतरत आहेत, पण नदीतील पाण्याचा प्रवाह अतिशय धोकादायक पातळीवर पोहोचला आहे. अशा परिस्थितीत प्रशासनाची आपत्कालीन यंत्रणा अद्याप निष्क्रिय असल्याचे स्पष्ट दिसून येत आहे.

भाविकांना थांबवण्यासाठी आवश्यक त्या ठिकाणी बॅरिगेटिंगही करण्यात आलेली नाही, त्यामुळे एखादी मोठी दुर्घटना घडण्याचा धोका वाढला आहे. सध्या काही ठिकाणी भाविक पाण्यात बुडाल्याच्या घटनाही समोर येत असताना, प्रशासनाची ढिसाळ आणि उदासीन भूमिका गंभीर चिंता निर्माण करत आहे. तात्काळ योग्य ती खबरदारी न घेतल्यास, याचा गंभीर परिणाम होण्याची शक्यता आहे.

चंद्रभागा नदीत सध्या पूरस्थिती निर्माण झाली असतानाही आपत्ती व्यवस्थापन यंत्रणा प्रत्यक्षात दिसून येत नसल्याबद्दल चिंता व्यक्त होत आहे. यावर सोलापूर जिल्ह्याचे पालकमंत्री जयकुमार गोरे यांनी प्रतिक्रिया देताना, चंद्रभागा तीरावर कायमस्वरूपी आपत्ती व्यवस्थापन यंत्रणा उभी करण्याबाबत लवकरच निर्णय घेतला जाईल, असे स्पष्ट केले आहे. चंद्रभागेला दरवर्षी अशा पूरस्थितीचा सामना करावा लागत असून, काही दुर्घटनाही घडत असल्याने आता हा प्रश्न गांभीर्याने हाताळण्याची गरज आहे, असेही त्यांनी नमूद केले.