पडेगाव येथे मंगळवारी दुपारी साडेतीनच्या सुमारास कचरा डेपोला आग लागली होती. रात्री एकपर्यंत तीन अग्निशमन बंबांच्या माध्यमातून आग नियंत्रणात आणण्याच्या प्रयत्न केला. यासाठी दहापेक्षा अधिक टँकर पाण्याचा मारा करण्यात आला. मात्र, त्या कचऱ्यातून बुधवारी दिवसभर धूर निघत होता. यामुळे परिसरात मोठ्या प्रमाणात वातावरण दूषित झाले. नेहमी ९५ च्या आसपास असणारा एअर क्वालिटी इंडेक्स बुधवारी १०२ पेक्षा अधिक झाल्याची नोंद झाली. पडेगाव परिसरातील नागरिकांना या धुरामुळे दिवसभर त्रास सहन करावा लागला. श्वसनाचे आजार असलेले रुग्ण यामुळे त्रस्त असल्याचे स्थानिक नागरिक सांगत होते. या कचऱ्यामध्ये प्लास्टिक मोठ्या प्रमाणात असल्याने नागरिकांना दुर्गंधीचा त्रास सहन करावा लागला. धूर आटोक्यात येत नसल्याने बुधवारी संध्याकाळी पुन्हा एकदा फायर ब्रिगेडच्या माध्यमातून पाणी मारून धूर कमी करण्याचा प्रयत्न करण्यात आला. मात्र, त्याला यश आले नसल्याचे दिसत आहे. मनपाचे तक्रारींकडे दुर्लक्ष
पडेगाव येथील कचरा प्रोसेसिंग सेंटरमुळे परिसरात दुर्गंधी पसरली आहे. आरोग्याला धोका निर्माण होत असल्याच्या तक्रारी नागरिकांनी केल्या आहेत. मात्र, याकडे मनपाने डोळेझाक केल्याचे पाहायला मिळत आहे. या डेपोमध्ये दररोज सुमारे दीडशे टन कचऱ्यावर प्रक्रिया केली जाते. कचऱ्याच्या ढिगातून मिथेन वायू तयार होतो. त्यामुळे या कचरा डेपोला उन्हाळ्यात वारंवार आग लागण्याच्या घटना घडत आहेत, असे नागरिकांनी सांगितले.
वर्षभरात कचऱ्याला आगीच्या २३६ घटना
मागील वर्षभरात २३६ घटना या कचऱ्याला आग लागल्याच्या आहेत. त्यातील ४० टक्क्यांपेक्षा अधिक कॉल पडेगाव येथील कचऱ्याला आग लागण्याचे होते. या समस्येचे कायमस्वरूपी नियोजन करण्यासाठी मनपाकडून या ठिकाणी १ कोटी ६७ लाख ८४ हजार रुपये खर्चून अग्निशमन यंत्रणा उभारली आहे. या यंत्रणेमुळे कचरा डेपोचा सर्व परिसर कव्हर होत असून आग लागल्यास त्यावर पाण्याचा मारा करून तत्काळ ही आग आटोक्यात आणता येणार होती. मात्र, याचा फारसा फायदा होत नसल्याचे दिसत आहे.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
