Nashik Crime News: महाराष्ट्रामध्ये सध्या डान्सबार एका वेगळ्याच राजकीय कारणामुळे चर्चेत आहेत. राज्याचे गृह राज्यमंत्री योगेश कदम आणि उद्धव ठाकरेंच्या सेनेचे आमदार अनिल परब यांच्यामध्ये डान्सबारच्या विषयावरुन चांगलीच जुंपल्याचं चित्र दिसत आहे. योगेश कदम यांच्या आईच्या नावावर बारचा परवाना असलेल्या ठिकाणी डान्सबार चालवला जात असल्याचा आरोप अनिल परब यांनी केला. हा आरोप योगेश कदम आणि त्यांचे वडील तसेच शिंदेंच्या शिवसेनेचे नेते रामदास कदम यांनी फेटाळला. या प्रकरणामध्ये अनिल परबांनी थेट मुख्यमंत्र्यांची भेट घेऊन योगेश कदमांबद्दल तक्रार नोंदवल्याचंही सांगितलं. या प्रकरणावरुन राज्यात डान्सबार चर्चेत असतानाच नाशिकमधून याच डान्सबारसंदर्भात अत्यंत धक्कादायक बातमी समोर आली आहे.
काय घडलं नाशिकमध्ये?
नाशिकमध्ये पती-पत्नीच्या नात्याला काळीमा फासणारी हादरवून टाकणारा घटनाक्रम समोर आला आहे. पतीनेच पत्नीचे अश्लील व्हिडीओ काढून तिला ब्लॅकमेल केल्याची तक्रार पोलिसांकडे नोंदवण्यात आली आहे. आश्चर्याची गोष्ट म्हणजे पत्नीला ब्लॅकमेल करत तिला नवऱ्यानेच डान्सबारमध्ये नाचण्यास भाग पाडण्यात आल्याचं तक्रारीत म्हटलं आहे. या प्रकरणातील तपशील ऐकून पोलीसही चक्रावून गेले आहेत.
नक्की कुठे घडला हा विचित्र प्रकार?
मिळालेल्या माहितीनुसार, नाशिकच्या हिरावाडीमध्ये ही अत्यंत विचित्र घटना घडली आहे. आरोपी पतीने पत्नीला आधी गुंगीचे औषध दिले. पत्नी शुद्धीत नसतानाच पतीने स्वत:च्या मोबाईलमध्ये घरात तिचे काही अश्लील व्हिडिओ काढले. पत्नी शुद्धीवर आल्यानंतर तुझे हे अश्लील व्हिडीओ व्हायरल करेल अशी धमकी आरोपी पतीने दिली.
अश्लील व्हिडीओचा वापर करुन पतीनं काय केलं?
अश्लील व्हिडीओ व्हायरल करण्याची धमकी देत पती वेळोवेळी आपल्याला मारहाण आणि शिवीगाळ करायचा असा आरोप पीडित महिलेने केला आहे. एवढेच नाही तर अश्लील व्हिडीओ व्हायरल करण्याची धमकी देत पतीने आपल्याला जबरदस्तीने डान्सबारमध्ये नाचण्यास भाग पाडले असा गंभीर आरोप पत्नीने केला आहे.
कुठे नोंदवण्यात आली तक्रार?
पीडितेच्या तक्रारीनंतर नाशिकच्या पंचवटी पोलिसात पती आणि त्याच्या मित्रावर गुन्हा दाखल करण्यात आला आहे. या प्रकरणाचा पुढील तपास पंचवटी पोलीस करत आहेत.
कोणत्या गोष्टींचा शोध घेत आहेत पोलीस?
पतीने इतकं विचित्र कृत्य करण्यामागील नेमकं कारण काय आहे याचा शोध पोलीस घेत आहेत. तसेच यापूर्वी त्याने अशाप्रकारे नकळतपणे त्याने आधीही पत्नीचे व्हिडीओ शूट केले आहेत का? त्याने असे व्हिडीओ शूट करुन आधी कोणाला पाठवले आहेत का? याचाही शोध पोलीस घेणार असल्याची माहिती मिळत आहे.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
