उपमुख्यमंत्री एकनाथ शिंदे यांनी संशोधक विद्यार्थ्यांना आश्वासन दिले आहे की, पुढील पंधरा दिवसांत पीएचडी अधिछात्रवृत्तीची जाहिरात प्रसिद्ध केली जाईल. या संदर्भात उपमुख्यमंत्री कार्यालयात मंगळवारी एक बैठक पार पडली.
.
या बैठकीला उपमुख्यमंत्री एकनाथ शिंदे यांच्यासह उच्च व तंत्र शिक्षण मंत्री चंद्रकांतदादा पाटील, सामाजिक न्याय मंत्री संजय शिरसाठ, बहुजन कल्याण मंत्री अतुल सावे आणि आदिवासी विकास मंत्री अशोक उईके उपस्थित होते. सारथी, बार्टी, महाज्योती, अमृत, टार्टी, आर्टी या संस्था ज्या विभागांतर्गत येतात, त्या विभागांचे सचिव आणि अधिकारीही बैठकीत सहभागी झाले होते. संबंधित संस्थांचे कार्यकारी संचालक आणि अधिकारी ऑनलाइन माध्यमातून उपस्थित होते.
युवा सेना सचिव किरण साळी यांच्या मार्गदर्शनाखाली पुणे येथून काही विद्यार्थी प्रतिनिधी या बैठकीसाठी आले होते. विद्यार्थी प्रतिनिधी नितीन आंधळे, दयानंद पवार, परिमल कुंभार आणि ओंकार आढाव यांनी विद्यार्थ्यांच्या समस्या मांडल्या. सर्व संस्थांच्या विद्यार्थ्यांना नोंदणी दिनांकापासून सरसकट अधिछात्रवृत्ती देण्याची मागणी विद्यार्थ्यांनी केली.
उपमुख्यमंत्री शिंदे यांनी विद्यार्थ्यांच्या संशोधन विषयांची माहिती घेतली. समाजाला उपयुक्त ठरतील अशा विषयांमध्ये संशोधन होणे आवश्यक असल्याचे त्यांनी नमूद केले. मुंबई विद्यापीठाच्या कुलगुरूंना पीएचडी अधिछात्रवृत्ती नियमावली तयार करण्यासंदर्भात लवकरात लवकर अहवाल सादर करण्याचे निर्देशही शिंदे यांनी दिले.
यावेळी शिंदे यांनी विद्यार्थ्यांना पंधरा दिवसांत पीएचडी अधिछात्रवृत्तीची जाहिरात प्रसिद्ध करण्याचे आश्वासन दिले. विद्यार्थी प्रतिनिधी नितीन आंधळे यांनी या बैठकीला सकारात्मक म्हटले. मागील वर्षी शिंदे यांनी सर्व संस्थांच्या संशोधक विद्यार्थ्यांना सरसकट अधिछात्रवृत्ती देण्याचा निर्णय घेतला होता, त्यामुळे यावेळीही सर्व विद्यार्थ्यांना न्याय मिळेल अशी अपेक्षा त्यांनी व्यक्त केली.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
