पुणे मनपाची मान्सूनपूर्व तयारी: कामे न करणाऱ्या ठेकेदारांना काळ्या यादीत टाकणार; 201 क्रॉनिक स्पॉटपैकी 117 ठिकाणी काम पूर्ण – Pune News

.

पावसाळापूर्व कामात सुसूत्रता येण्यासाठी सर्व विभागाकडून एकत्रित काम केले जाईल.नालेसफाईचे यंदा 23 टेंडर मनपाने काढली असून साडेचौदा कोटी रुपये खर्च करण्यात येत आहे. तर पावसाळी कामाबाबत 15 टेंडर काढून कामे करण्यात येत आहे. जे ठेकेदार कामाची निविदा घेऊन प्रत्यक्ष काम करत नाही अशा तक्रारी काही तक्रारी आमच्याकडे प्राप्त झालेले आहेत. यापुढे अशी गोष्ट कुठे दिसल्यास संबंधित ठेकेदारांना काळया यादीत टाकले जाईल असा इशारा केंद्रीय राज्यमंत्री आणि पुण्याचे खासदार मुरलीधर मोहोळ यांनी पत्रकार परिषदेत दिला.

पुणे मनपा मध्ये राजेंद्र भोसले मनपा आयुक्त आणि इतर प्रशासकीय अधिकारी यांच्या सोबत मान्सूनपूर्व तयारी आढावा घेतल्यावर ते बोलत होते. यावेळी भाजप शहराध्यक्ष धीरज घाटे,आमदार हेमंत रासने, माजी सभागृह नेते श्रीनाथ भिमाले , माजी उपमहापौर सरस्वती शेंडगे, आबा शिळीमकर उपस्थित होते.

मोहोळ म्हणाले, पुण्यात आधी 117 क्रॉनिक स्पॉट होते त्यानंतर 22 गावे समाविष्ट झाल्यावर आता 201 क्रॉनिक स्पॉट आहे. त्याठिकाणी अनेक वर्ष पाणी साठत आहे. त्यापैकी 117 स्पॉटचे काम पूर्ण झाले आहे. त्याजागी नालेसफाई झाली असून उर्वरित 84 जागांवर काम सुरू आहे. ती कामे पावसाळापूर्व पूर्ण होतील.इतर जे 39 स्पॉट कामे यंदा पूर्ण होऊ शकणार नाही त्याठिकाणी तात्पुरते उपाययोजना करण्यात येत आहे. नागरिकांचे हाल होऊ नये याची दखल प्रशासनाने घ्यावी अशी सूचना मनपाला दिल्या आहे. सन 2019 मध्ये आंबील ओढा येथे पूर येऊन मोठी आपत्ती आली होती. त्यानंतर उपाययोजना काम करून कात्रज ते दत्तवाडी दरम्यान नाले दुरुस्ती आणि रुंदीकरण करण्यात आल्याने परत काही अडचण आली नाही. पुण्यात नगरसेवक नसले तरी मनपात आमदार, खासदार लक्ष्य देत असून समन्वयाने काम करण्याचे ठरले आहे. पुण्यात मान्सूनपूर्व कामाचा वॉर्ड निहाय रिपोर्ट करून त्याचा एकत्रित अहवाल करण्याच्या सूचना दिल्या आहे. प्रत्येक जागी कर्मचारी यांची जबाबदारी निश्चित करण्यास देखील सांगितली आहे.जे नेमून दिलेली कामे करत नाही त्यांच्यावर कारवाई करण्यात येईल.