पुण्याहून नवी मुंबई विमानतळ अवघ्या सव्वा तासांत, देवेंद्र फडणवीसांनी सांगितलं नवीन मार्ग कधी सेवेत येणार?

Mumbai Pune Missing Link: मुंबई-पुणे एक्स्प्रेस वेला पर्यायी रस्ता असलेला मिसिंग लिंक लवकरच नागरिकांच्या सेवेत येणार आहे. आज मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांनी मिसिंग लिंकचा पाहणी दौरा केला आहे. मुंबई पुणे एक्स्प्रेसवेच्या 13 किमी लांबीच्या मिसिंग लिंकचे काम डिसेंबरपर्यंत पूर्ण होईल, असे सांगितले जात होते. मात्र आज मुख्यमंत्री देवेंद्र फडणवीस यांनी ऑक्टोबरपर्यंत मिसिंग लिंक सेवेत येईल, असं म्हटलं आहे. मिसिंग लिंक प्रकल्पाचे काम 94 टक्के पूर्ण झाले असून उर्वरित काम ऑक्टोबरपर्यंत पूर्ण होईल, अशी शक्यता मुख्यमंत्र्यांनी व्यक्त केली आहे.

मिसिंग लिंकचे काम डिसेंबरपर्यंत पूर्ण करु असं त्यांनी म्हटलं आहे. पण आमची त्यांना विनंती आहे त्यांनी ऑक्टोबरपर्यंत पूर्ण करावे फार फारतर नोव्हेंबरपर्यंत पूर्ण करावे. आज आम्ही त्यांच्याशी चर्चा करुन त्याची नवीन डेडलाइन ठरवू, असं देवेंद्र फडणवीस यांनी म्हटलं आहे.

पुण्याच्या नागरिकांना पुण्याचे एअरपोर्ट तर आहेच. तसंच, नवीन पुण्यातदेखील एअरपोर्ट होतंय. पण आता या मिसिंग लिंकमुळं एक ते सव्वा तासात पुणेकर नवी मुंबई विमानतळावर पोहोचू शकणार आहेत. त्यामुळं जी आपली अपेक्षा होती की मुंबई-पुणे इकोनॉमि कॉरिडॉर तयार व्हावा, तो आता होतोय. मिसिंग लिंक हा त्याचाच एक भाग आहे, असंही फडणवीसांनी म्हटलं आहे. मिसिंग लिंकमुळं मुंबई-पुणे वेवरील ट्रॅफिक कमी होणार आहे. तसंच, दोन महत्त्वाचे फायदे म्हणजे 6 किमीचं अंतर कमी होणार आहे आणि दुसरं म्हणजे मुंबई-पुणे प्रवासासाठी अर्धा तास कमी लागणार आहे, असंही त्यांनी म्हटलं आहे.

कसा आहे मिसिंग लिंक प्रकल्प?

मुंबई-पुणे द्रुतगती मार्गावरील खोपोली एक्झिट ते कुसगाव या भागातील 13.3 किमी लांबीचा हा पर्यायी रस्ता आहे. 2019 मध्ये या प्रकल्पाचे काम हाती घेण्यात आले होते. या भागात डोंगरभाग मोठ्या प्रमाणात असून १३० मीटर उंचीच्या केबल पुलावर काँक्रिटीकरण करण्याचे कामही सुरू होते

खोपोली येथून सुरू होणार पर्याय रस्ता

दोन आठ लेनचे बोगदे असून 1.75 किमी आणि 8.92 किमी लांबीचा असणार आहे

दोन आठ लेनचे व्हायाडक्ट 790 मीटर आणि 650 मीटर लांबी

लोणावळा-खंडाळा विभागात टायगर व्हॅलीपासून 100 मीटर उंचीवर असलेला 640 मीटर लांबीचा केबल स्टेड पुल असणार आहे.