पुणे शहर गुन्हे शाखेच्या युनिट सहाने एका मोठ्या गुन्हेगाराला अटक केली आहे. हमीद अफसर खान (३०) या आरोपीने स्वतःला पोलीस म्हणवून अनेक ज्येष्ठ नागरिकांची फसवणूक केली होती. तो लोणी काळभोर, पुणे-सोलापूर रस्त्यावरील पठारे वस्तीचा रहिवासी आहे.
.
पोलिसांच्या तपासात आरोपीने पुणे शहर आणि परिसरात केलेले आठ गुन्हे उघडकीस आले आहेत. पर्वती, कोथरूड, कोंढवा, सिंहगड रस्ता, भारती विद्यापीठ आणि सासवड परिसरात त्याने लुटमारीचे गुन्हे केले होते. आरोपीकडून सात लाख ६८ हजार रुपयांचे सोन्याचे दागिने आणि एक दुचाकी जप्त करण्यात आली आहे. एकूण मुद्देमालाची किंमत आठ लाख ६८ हजार रुपये आहे.
गुन्हे शाखेच्या पथकाला स्मशानभूमीजवळ आरोपी येणार असल्याची माहिती मिळाली होती. पोलीस कर्मचारी नितीन मुंढे आणि कानिफनाथ कारखेले यांनी सापळा रचून त्याला पकडले. चौकशीदरम्यान आरोपीने आणि त्याच्या साथीदाराने गुन्ह्यांची कबुली दिली.
पोलिसांनी नागरिकांना सावधानतेचा इशारा दिला आहे. अशा प्रकारच्या बतावणी करणाऱ्या व्यक्तींपासून सावध राहण्याचे आवाहन केले आहे. काही चोरटे ‘मालकाला मुलगा झाला आहे’ किंवा ‘ज्येष्ठांना धान्य व कपडे वाटप करण्यात येत आहे’ अशी बतावणी करून फसवणूक करत असल्याचेही समोर आले आहे.
अतिरिक्त पोलीस आयुक्त शैलेश बलकवडे, उपायुक्त निखील पिंगळे, सहायक आयुक्त राजेद्र पिंगळे यांच्या मार्गदर्शनाखाली गुन्हे शाखा युनिट सहाचे पोलीस निरीक्षक वाहिद पठाण, सहायक निरीक्षक मदन कांबळे, उपनिरीक्षक रामकृष्ण दळवी, नितीन मुंढे, कानिफनाथ कारखेले, बाळासाहेब सकटे, रमेश मेमाणे, सुहास तांबेकर, सचिन पवार, ऋषीकेश ताकवणे, ऋषीकेश व्यवहारे, बाळासाहेब तनपुरे, गणेश डोंगरे, नितीन घाडगे, शेखर काटे, प्रतिक्षा पानसरे, कीर्ती नरवडे यांनी ही कामगिरी केली.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
