प्रतिभावंत साहित्यिक गमावला: ज्येष्ठ कादंबरीकार शुभांगी भडभडे यांचे नागपूरमध्ये निधन; तब्बल 82 पुस्तके प्रसिद्ध, मुख्यमंत्र्यांकडून शोक व्यक्त – Nagpur News

.

शुभांगी भडभडे या साहित्य क्षेत्रातील उत्तम संघटकही होत्या. वैदर्भीय लेखकांना व्यासपीठ देण्यासाठी त्यांनी पद्मगंधा प्रतिष्ठानची स्थापना केली. या प्रतिष्ठानच्या माध्यमातून अनेक उपक्रम यशस्वी केले. त्यांच्या निधनाबद्दल मुख्यमंत्री देवेंद्र फडणवीस, केंद्रीय मंत्री नितीन गडकरी, मंत्री चंद्रकांत पाटील यांनी शोक व्यक्त केलाय.

एकूण 45 कादंबऱ्यांचे लेखन

शुभांगी भडभडे यांनी तब्बल 22 सामाजिक आणि 23 चरित्रात्मक कादंबऱ्यांचे लेखन केले. त्यांच्या 18 कादंबऱ्या हिंदीत प्रकाशित झाल्यात. त्यांची आठ महानाटकेही हिंदी प्रकाशित झाली. त्यांच्या कादंबऱ्या आणि कथा, नाटके मराठीसोबतच हिंदीमध्ये प्रसिद्ध झाले. त्यांना अनेक मानाचे पुरस्कार मिळाले. विदर्भ साहित्य संघाचा पुरस्कार, सारथी साहित्य ॲवार्ड, महाराष्‍ट्र सरकारचा उत्कृष्‍ट वाड‍्मय पुरस्कार, साहित्य अकादमी बडोदेचा कथा पुरस्कार, सुमन देशपांडे बाल साहित्य पुरस्कार, पंजाब सरकारचा पुरस्कार, कोलकात्याचा प्रज्ञा पुरस्कारासह अनेक पुरस्कारांनी त्यांचा गौरव झाला. त्यांची नाटके अंदमान ते लेह लडाख, दार्जिलिंग ते द्वारका , हिमाचल ते गोवा, दुबई आणि अमेरिकेत झाली. राष्टीय चरित्र कादंबरीकार उपाधीनेही त्यांचा गौरव झालाय.

चरित्रलेखनात मोठे योगदान

मुख्यमंत्री देवेंद्र फडणीस यांनी शुभांगी भडभडे यांच्या निधनाबद्दल दुःख व्यक्त केले. ते आपल्या शोकसंदेशात म्हणतात की, ‘सुप्रसिद्ध लेखिका, ज्येष्ठ कादंबरीकार आणि पद्मगंधा प्रतिष्ठानच्या माध्यमातून नवोदित लेखकांना व्यासपीठ उपलब्ध करून देणाऱ्या साहित्यसाधक शुभांगीताई भडभडे यांच्या निधनाचे वृत्त अतिशय दुःखद आहे. 80 हून अधिक कादंबऱ्या लिहिताना त्यांनी चरित्रलेखनाच्या क्षेत्रात मोठे योगदान दिले. स्वातंत्र्यवीर सावरकर, आद्य सरसंघचालक प.पू. डॉ. हेडगेवारजी, प. पू. गोळवलकर गुरुजी, मा. पंतप्रधान नरेंद्र मोदीजी यांच्यावरही त्यांनी चरित्रलेखन केले होते. त्यांच्या निधनाने एक प्रतिभावंत साहित्यिक आपण गमावला आहे आणि साहित्य क्षेत्राने एक ज्येष्ठ मार्गदर्शक! ‘मृत्युंजयाचा महायज्ञ’ ही कादंबरी त्यांनी स्वातंत्र्यवीर सावरकर यांच्यावर लिहिली, तेव्हा त्याला ‘ऑडियो बुक’मध्ये रूपांतरित करण्याची विनंती मी त्यांना केली होती आणि त्यांनी त्याला सहर्ष होकार दिला आणि ते काम पूर्ण झाले. अनेक पुस्तकांना त्यांनी हक्काने माझ्याकडून प्रस्तावना घेतल्या. त्यामुळे सातत्याने त्यांच्याशी संवाद व्हायचा. मी त्यांना भावपूर्ण श्रद्धांजली अर्पण करतो. त्यांचे कुटुंबीय, आप्तस्वकीय आणि चाहत्यांच्या दुःखात आम्ही सहभागी आहोत. ॐ शांती.’

संमेलनांचे यशस्वी आयोजन

केंद्रीय मंत्री नितीन गडकरी यांनी शुभांगी भडभडे यांच्या निधनाबद्दल दुःख व्यक्त केले. ते आपल्या शोकसंदेशात म्हणतात की, ‘ज्येष्ठ कादंबरीकार शुभांगी भडभडे यांच्या निधनाची बातमी समजली. शुभांगीताईंनी साहित्य क्षेत्रात दिलेले योगदान कधीही विसरता येणार नाही. ऐंशीहून अधिक कादंबऱ्या लिहून त्यांनी साहित्याचा एक अमूल्य ठेवा आपल्या वाचकांसाठी मागे ठेवला आहे. पद्मगंधा प्रतिष्ठानच्या माध्यमातून लेखिका नाट्य महोत्सवासारख्या अनोख्या उपक्रमाचे त्यांनी सातत्याने आयोजन केले. अनेक साहित्य संमेलनांचे आयोजन केले. केवळ नागपूर नव्हे, तर संपूर्ण विदर्भातील लेखिकांना एका धाग्यात बांधून नवलेखिकांना प्रोत्साहन देण्याचे कार्य त्यांनी केले. त्यांच्या निधनाने साहित्य क्षेत्राची मोठी हानी झाली आहे. शुभांगीताईंना भावपूर्ण श्रद्धांजली. या दुःखातून सावरण्याचे बळ भडभडे कुटुंबियांना मिळो, अशी परमेश्वराकडे प्रार्थना करतो. ॐ शांती.’

पद्मगंधा प्रतिष्ठानच्या आधारस्तंभ

मंत्री चंद्रकांत पाटील यांनीही शुभांगी भडभडे यांच्या निधनाबद्दल शोक व्यक्त केले. ते आपल्या शोकसंदेशात म्हणतात की, ‘सुप्रसिद्ध लेखिका, ज्येष्ठ कादंबरीकार आणि नवोदित साहित्यिकांच्या सृजनात्मक उभारणीस कटिबद्ध राहिलेल्या पद्मगंधा साहित्य प्रतिष्ठानच्या संस्थापक अध्यक्षा शुभांगीताई भडभडे यांच्या निधनाचे वृत्त अत्यंत दुःखद आणि साहित्यविश्वासाठी धक्कादायक आहे. त्यांचे लेखन हे केवळ साहित्य नव्हते, तर सामाजिक जाणिवा, मानवी संवेदना आणि विचारशील स्त्रीमनाचं समृद्ध प्रतिबिंब त्यांच्या लेखनामध्ये होते. त्यांनी निर्माण केलेले पद्मगंधा प्रतिष्ठान हे नवोदित लेखकांचे प्रेरणास्थान ठरले. त्यांची वैचारिक प्रगल्भता आणि अनुभवाधिष्ठित लेखनशैली आजच्या लेखकांसाठी दीपस्तंभ ठरेल. शुभांगीताईंच्या पवित्र स्मृतींना भावपूर्ण श्रद्धांजली अर्पण करतो. त्यांचे कुटुंबीय, आप्तस्वकीय आणि चाहत्यांच्या दुःखात आम्ही सहभागी आहोत. ॐ शांती.’