इतिहास संशोधक इंद्रजित सावंत यांच्यावर छत्रपती शिवाजी महाराज व छत्रपती संभाजी महाराज यांचा कथित अवमान केल्याचा आरोप केल्याप्रकरणी वकील असीम सरोदे यांनी सोमवारी कथित पत्रकार प्रशांत कोरटकरला कोल्हापूर कारागृहाच्या पत्त्यावरच अब्रुनुकसानीची नोटीस बजावल
.
प्रशांत कोरटकरने इतिहास संशोधक इंद्रजित सावंत यांना फोनवरून धमकी दिली होती. त्यात त्याने छत्रपती शिवाजी महाराज व संभाजी महाराज यांच्याविषयीही वादग्रस्त विधान केले होते. या प्रकरणी त्याला अटक करण्यात आली आहे. पण आता कोरटकरने आपल्या जामीन अर्जात इंद्रजित सावंत यांच्यावरच छत्रपती शिवाजी महाराज व संभाजी महाराज यांचा अवमान केल्याचा आरोप केला आहे. त्यामुळे सावंत यांनी असीम सरोदे यांच्या मार्फत कोरटकरला अब्रुनुकसानीची नोटीस बजावली आहे.
इंद्रजित सावंतांवरच छत्रपतींचा अवमान केल्याचा आरोप
इंद्रजित सावंत यांच्यावर छत्रपती शिवाजी महाराज व छत्रपती संभाजी महाराज यांचा अवमान केला. त्यांच्यावर सामाजिक तेढ निर्माण करण्याचे विविध गुन्हे दाखल आहेत. त्यांना अटकही झाली होती, असे विविध खोटे आरोप प्रशात कोरटकरने आपल्या जामीन अर्जात केलेत. पण आम्ही आक्षेप घेतल्यानंतर त्यांनी हे आरोप मागे घेतल्याचे न्यायालयापुढे लेखी स्वरुपात मान्य केले. त्यामुळे माझ्या अशिलाची मानहाणी केल्याप्रकरणी त्यांना अब्रुनुकसानीची नोटीस बजावण्यात येत आहे, असे असीम सरोदे यांनी आपल्या नोटीसीत म्हटले आहे.
असीम सरोदे नोटीसीत पुढे म्हणाले की, माझा अशील (इंद्रजित सावंत) हा कायद्याचे पालन करणारे व्यक्ती आहेत. ते इतिहास संशोधक आहेत. त्यांनी मराठ्यांच्या इतिहासाचा विशेष अभ्यास केला आहे. ते आपल्या अभ्यासाचे तथ्यात्मक पैलू अतिशय सभ्य पद्धतीने मांडण्यासाठी ओळखले जातात. पण विविध न्यायालयांत तुम्ही चुकीचे व मानहानीकारक दावे लिखित स्वरुपात दाखल माझ्या अशिलाची गंभीर मानहाणी केली. अशा प्रकारच्या परिच्छेदात तुम्ही इंद्रजित सावंत यांना एक वाईट व्यक्ती म्हणून चित्रित केले. यामु्ळे त्यांच्या महाराष्ट्रातील प्रतिष्ठेला जबर धक्का बसला.
7 दिवसांत नोटीसीला उत्तर देण्याची मागणी
माझ्या अशिलाच्या आक्षेपानंतर आपण हे आरोप मागे घेतले. पण वस्तुस्थिती ही आहे की, तुमच्या आरोपामुळे माझे क्लायंट इंद्रजित सावंत यांच्या प्रतिष्ठेला ठेच पोहोचली. त्यामुळे एकतर तुम्ही या प्रकरणी सावंत यांची लेखी माफी मागा किंवा तुमच्याविरोधात मानहाणीचा दिवाणी व फौजदारी गुन्हा दाखल करून कोर्टाचा दरवाजा ठोठावला जाईल.
माझा अशिल यासंबंधी कोर्टाकडे नुकसानभरपाईचीही मागणी करेल. माझ्या अशिलाने या प्रकरणी मिळणारी कोणतीही नुकसानभरपाई ही मराठा रेजिमेंटच्या शहीद सैनिकांच्या कोणत्याही सैनिकाला दान करण्याचाही निर्णय घेतला आहे हे लक्षात ठेवा. त्यामुळे या नोटीसीला 7 दिवसांच्या आत उत्तर देऊन आपली बाजू स्पष्ट करा, अशी मागणी असीम सरोदे यांनी या नोटीसीद्वारे कोरटकरकडे केली आहे.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
