Maharashtra MP Vs BJP Nishikant Dubey In Parliament: वेळ साधारण दुपारच्या आसपास… ठिकाण भारतीय संसदेच्या नव्या इमारतीमधील लॉबी… अचानक भाजपाचे खासदार निशिकांत दुबेंना शोधत काही महिला खासदार त्यांच्या दिशेने वेगाने चालत आल्या. त्यांना घेराव घातला आणि प्रश्नांची रसबत्ती सुरु केली. हा सारा प्रकार पाहून सत्ताधारी राष्ट्रीय लोकशाही आघाडीच्या मित्र पक्षांमधील महाराष्ट्रातील खासदारांच्या चेहऱ्यावरही हसू फुलल्याचं पाहायला मिळालं. या गोंधळाला कारण ठरला तो दुबेंचा महाराष्ट्र द्वेष! दुबेंना थेट संसदेच्या लॉबीमध्ये महाराष्ट्राबद्दल केलेल्या वादग्रस्त विधानावर तोंडावर जाब विचारण्याची हिंमत दाखवणाऱ्या महाराष्ट्रातील तीन महिला खासदारांचं तोंडभरुन कौतुक होताना दिसतंय. असं असतानाच दुसरीकडे दुबेंना मात्र या साऱ्या गोंधळातून एक वाक्य बोलून पळ काढावा लागला. नेमकं बुधवारी संसदेच्या लॉबीत घडलं काय जाणून घेऊयात. त्याआधी दुबेंनी काय विधानं केलेली हे समजून घेणं महत्त्वाचं आहे.
दुबेंचा मराठी आणि महाराष्ट्र द्वेष
निशिकांत दुबेंना बुधवारी महाराष्ट्रातील मराठी महिला खासदारांनी दणका देण्यासाठी कारण ठरलं ते त्यांचं मराठी आणि महाराष्ट्राबद्दलचं वादग्रस्त विधान. मगील महिन्यामध्ये राज्यात पहिल्या इयत्तेपासून त्रिभाषासूत्रीच्या माध्यमातून हिंदी लादण्याचा प्रयत्न होत असल्याचा आरोप करत विरोधी पक्षांपैकी उद्धव ठाकरेंच्या शिवसेनेनं आणि राज ठाकरेंच्या शिवसेनेनं थेट रस्त्यावर उतरुन आंदोलन करण्याचा इशारा दिला. या इशाऱ्यानंतर 5 जुलै रोजी हिंदीच्या सक्तीविरोधात मुंबईत दोन्ही ठाकरे बंधुंच्या पक्षाने संयुक्त मोर्चा काढणार असल्याची घोषणा केली. मात्र त्यापूर्वीच मुख्यमंत्री देवेंद्र फडणवीस यांनी त्रिभाषासूत्रीचा शासन आदेश मागे घेत असल्याची घोषणा केली. यानंतर पाच जुलै रोजी वरळीमधील डोम येथे झालेल्या संयुक्त जल्लोष मेळाव्यात उद्धव ठाकरे आणि राज ठाकरेंनी मराठीसंदर्भात आपली भूमिका स्पष्ट केली.
5 जुलै रोजी झालेल्या ठाकरे बंधुंच्या मेळाव्यावर बोलताना दुबेंचा तोल सुटला आणि त्यांनी मराठी भाषेबरोबरच महाराष्ट्राबद्दल वादग्रस्त विधानं केली. जाणूनबुजून मराठी न बोलणाऱ्या परप्रांतीयांविरोधात राज्यात वातावरण तापले असताना, मनसेचे अध्यक्ष राज ठाकरेंनी बिहारला यावे, तेथे त्यांना ‘पटक-पटक के मारेंगे’ असे आव्हान दुबे यांनी एएनआय या वृत्तसंस्थेशी बोलताना दिले होते. ‘महाराष्ट्र आमच्या पैशांवर जगतो’ अशी दर्पोक्तीही दुबेंनी केली होती. याच दुबेंना बुधवारी मराठी महिला खासदारांनी खिंडीत गाठलं अन् चांगलाच इंगा दाखवला विरोधकांच्या गदारोळामुळे लोकसभेचे कामकाज तहकूब झाल्यानंतर वर्षा गायकवाड, शोभा बच्छाव, प्रतिभा धानोरकर या काँग्रेसच्या खासदार दुबे यांना शोधत होत्या. दुबे लॉबीमध्ये येताच तिघींनी त्यांना घेराव घातला आणि त्यांच्या विधानांबाबत जाब विचारला.
दुबेंना जाब विचारणाऱ्या महिला खासदार कोण?
बुधवारी विरोधकांच्या गदारोळामुळे लोकसभेचे कामकाज तहकूब झाल्यानंतर काँग्रेसच्या खासदार वर्षा गायकवाड, शोभा बच्छाव, प्रतिभा धानोरकर यांनी दुबेंना गाठण्याचं ठरवलं. कामकाज तहकूब झाल्यापासून या तिन्ही महिला खासदार भाजपा खासदार दुबे यांना शोधत होत्या.
तिघींनी काय विचारलं?
महाराष्ट्रातील काँग्रेसच्या तीन महिला खासदारांकडून दुबेंचा शोध सुरु असतानाच ते लॉबीमध्ये दिसले. या तिघींनी लगेच त्यांना घेराव घातला आणि त्यांच्या विधानांबाबत जाब विचारला. “मराठी लोकांना मारण्याची भाषा कशी करू शकता? तुम्ही आपटून आपटून कुणाला आणि कसे मारणार? कसली ही तुमची अर्वाच्च भाषा ? तुमचे वागणे-बोलणे योग्य नाही… मराठी भाषकांविरोधातील तुमची ही अरेरावी आम्ही खपवून घेणार नाही” अशा शब्दांत गायकवाड यांनी दुबेंना सर्वांसमोर संसदेच्या लॉबीमध्येच सुनावले. यानंतर या महिला खासदारांनी ‘जय महाराष्ट्र’ अशी घोषणाबाजी केली. दुबे गोंधळलेल्या अवस्थेत या तिघींसमोरुन निघून गेले.
संसदेच चर्चा आणि सत्ताधारी खासदारांना हसू
मोजून काही मिनिटांच्या या घडामोडीची संसदेच्या आवारामध्ये बुधवारी चांगलीच चर्चा रंगलेली. आश्चर्याची बाब म्हणजे हे सारं नाट्य घडत असताना लॉबीमध्ये उपस्थित असलेल्या महायुतीच्या मराठी खासदारांच्या चेहऱ्यावरही हलकसं हसू दिसून आलं.
दुबेंनी उत्तर देणं टाळलं
त्यानंतर काही वेळाने दुबे याच लॉबीमधून कॅन्टीनकडे जात असतानाच खासदार अनुप्रिया पटेल यांनी त्यांना हटकलं आणि नक्की मगाशी घडलं काय याबद्दल विचारलं. मात्र दुबेंनी हा विषय टाळण्याचा प्रयत्न करत प्रश्नाला बगल देत काढता पाय घेतला.
गायकवाड यांना पत्रकारांनी घेरलं
दुसरीकडे दुबेंना जाब विचारणाऱ्या वर्षा गायकवाड यांच्याभोवती पत्रकारांचा गराडा पडला आणि त्यांच्यावर प्रश्नांची सरबत्ती सुरु झाली. त्यावेळी वर्षा गायकवाड यांनी, आपण दुबेंना जाब विचारल्याचं सांगितलं. “दुबेंनी मराठी माणसाच्या स्वाभिमानाला धक्का दिला आहे. हे आम्ही कसं खपवून घेणार? आम्ही संसदेत मराठीचा आवज बुलंद करु, आम्ही गप्प बसणार नाही,” अशी प्रतिक्रिया वर्षा गायकवाड यांनी नोंदवली.
अचानक दुबे पत्रकारांशी संवाद सुरु असलेल्या ठिकाणी आले अन्..
हा सारा प्रकार सुरु असतानाच दुबे तिथे आले असता वर्षा गायकवाडांसहीत इतर महिला खासदारांनी ‘जय महाराष्ट्र’ अशी घोषणाबाजी सुरु केली. यामुळे दुबेंची पुन्हा गोची झाली आणि त्यांना अगदीच अवघडल्यासारखं झालं.
दुबे एकच वाक्य बोलून निघाले
मराठी महिला खासदारांचा राग काही शांत होत नसल्याचं दिसताच ‘जय महाराष्ट्र’च्या घोषणा ऐकून दुबेंनी वर्षा गायकवाड आणि त्यांच्या इतर दोन सहकारी महिला खासदारांसमोर हात जोडत, ‘आप तो मेरी बहन है’ म्हणत प्रसारमाध्यमांना टाळत काढता काय घेतला.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
