मुंबईत एका सीए तरुणाने आत्महत्या करत जीवन संपवलं आहे. पीडित तरुणाला त्याचा खासगी व्हिडीओ लीक करण्याची धमकी दिली जात ब्लॅकमेल केलं जात होतं अशी माहिती पोलिसांनी दिली आहे. राज मोरे असं या सीए तरुणाचं नाव आहे. शनिवारी रात्री त्याने सांताक्रूझ येथील आपल्या राहत्या घऱी विषप्राशन करुन आत्महत्या केली.
पोलिसांनी दिलेल्या माहितीनुसार, राज मोरे याने आत्महत्या करण्याआधी तीन पानांची सुसाईड नोट सोडली आहे. यामध्ये त्याने सबा कुरेशी आणि राहुल परनवानी यांची नावं लिहिली आहेत. या दोघांमुळे आपण आत्महत्या करत असल्याचं त्याने सुसाईड नोटमध्ये सांगितलं आहे. त्यांच्यामुळेच आपण टोकाचं पाऊल उचलत असल्याचा उल्लेख त्याने पत्रात केला आहे. पोलिसांनी आत्महत्येस प्रवृत्त केल्याच्या आणि खंडणीच्या कलमांखाली दोघांविरोधात गुन्हा दाखल केला आहे.
पोलिसांनी सांगितलं आहे की, मागील 18 महिन्यांपासून आरोपींनी खासगी व्हिडीओ सार्वजनिक करण्याची धमकी देत पीडित तरुणाकडून 3 कोटी रुपये उकळले. आरोपींमधील एक तरुणी आहे. सूत्रांच्या माहितीनुसार, राज मोरे एका प्रतिष्ठित कंपनीत नोकरी करत होता आणि त्याने मोठी गुंतवणूक केली होती. सोशल मीडियाद्वारे तो सबा कुरेशीच्या संपर्कात आला होता. त्यानंतर, राहुल परनवानीने मोरेच्या नकळत त्याचे इंटिमेट व्हिडिओ रेकॉर्ड केल्याचा आरोप आहे.
पोलिसांत देण्यात आलेल्या तक्रारीनुसार, दोन्ही आरोपी राज मोरेच्या वाकोला येथील निवासस्थानी आले होते. यावेळी त्यांनी राज मोरेला त्याच्या आईसमोरच मारहाण केली, शिवीगाळ केली. यादरम्यान त्याला पुन्हा एकदा व्हिडिओ लीक करण्याची करण्याची धमकी दिली. यानंतर परिस्थिती आणखी बिकट झाली.
सतत होणारं ब्लॅकमेलिंग आणि धमक्या यामुळे राज मोरे फार अस्वस्थ होता. यामुळेच त्याने रात्री विषप्राशन करुन आत्महत्या केली. सुसाईड नोटमधील मजकूर आणि कुटुंबियांच्या जबाबांवरून, मुंबई पोलिसांनी दोन्ही आरोपींचा शोध घेण्यासाठी आणि त्यांना अटक करण्यासाठी शोधमोहीम सुरू केली आहे.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
