प्रेम प्रकरणातून एका तरुणाने इमारतीच्या 11 व्या मजल्यावरून उडी मारून आपली जीवनयात्रा संपवल्याची घटना मुंबईलगतच्या ठाणे जिल्ह्यातील डोंबिवली उपनगरात घडली आहे. या घटनेचा एक व्हिडिओ सोशल मीडियात व्हायरल झाला असून, त्यात हा तरुण उडी मारताना दिसून येत आहे
.
ऋषिकेश परब असे आत्महत्या करणाऱ्या तरुणाचे नाव आहे. त्याने डोंबवली पश्चिम भागातील सुदामा इमारतीच्या 11 व्या मजल्यावरून उडी मारून आत्महत्या केली. मृत ऋषिकेशचे एका तरुणीवर प्रेम होते. पण त्यात अपयश आल्यामुळे त्याने आत्महत्या केली. यासंबंधीच्या माहितीनुसार, सकाळी 8 वाजेपासून हा तरुण आत्महत्या करण्याचा प्रयत्न करत होता. स्थानिक पोलिस व अग्निशमन दलाच्या जवानांनी त्याला त्यापासून परावृत्त करण्याचा प्रयत्न केला. पण त्यांना यश आले नाही. अखेर 12 च्या सुमारास त्याने इमारतीच्या 11 व्या मजल्यावरून उडी मारून आपली जीवनयात्रा संपवली.
या घटनेचा एक व्हिडिओ सोशल मीडियावर व्हायरल झाला आहे. हा व्हिडिओ शेजारच्या इमारतीमधील एका व्यक्तीने रेकॉर्ड केला आहे. त्यात ऋषिकेश परब हा बाल्कनीच्या ग्रिलला लोंबकळलेला दिसत आहे. अवघ्या 7 सेकंदाच्या या व्हिडिओत अखेर हाताची गाठ सैल झाल्यामुळे तो खाली कोसळताना दिसून येत आहे. पोलिसांनी या प्रकरणी गुन्हा दाखल करून पुढील तपास सुरू केला आहे.
पवईत प्रियकराची आत्महत्येनंतर प्रेयसीचाही आत्महत्येचा प्रयत्न
दुसरीकडे, मुंबईच्या पवई परिसरातही अशीच एक घटना घडली आहे. या घटनेतही एका 19 वर्षीय तरुणाने प्रेम प्रकरणातून घरातील अँगलला साडीने गळफास घेऊन आत्महत्या केली. या घटनेनंतर त्याच्या शेजारी राहणाऱ्या एका तरुणीनेही आत्महत्या करण्याचा प्रयत्न केला. पण ती बचावली. तिच्यावर राजावाडी रुग्णालयात उपचार सुरू आहेत.
यासंबंधीच्या माहितीनुसार, श्रवण विनोद शिंदे असे आत्महत्या केलेल्या तरुणाचे नाव आहे. तो पार्कसाईट पोलिस ठाण्याच्या हद्दीत आयआयटी मार्केट महात्मा फुले नगर पवई येथे राहात होता. त्याचे शेजारच्याच एका मुलीवर प्रेम होते. त्याने कोणत्या तरी कारणाने घरातील लोखंडी अँगलला साडीने गळफास घेतला. त्यानंतर त्याला गंभीर स्थितीत राजावाडी रुग्णालयात दाखल करण्यात आले. तिथे डॉक्टरांनी त्याला वाचवण्याचे शर्थीचे प्रयत्न केले. पण अखेर उपचारादरम्यान त्याचा मृत्यू झाला.
या घटनेनंतर त्याच्या कुटुंबीयांनी शेजारच्या मुलीवर तिच्यामुळेच आपल्या मुलाने आत्महत्या केल्याचा आरोप केला. त्यामुळे घाबरून सदर मुलीनेही आपल्या घरात गळफास लावून आत्महत्या करण्याचा प्रयत्न केला. पण पोलिसांनी वेळीच दरवाजा उघडत तिला खाली उतरवले. सध्या तिच्यावर रुग्णालयात उपचार सुरू आहेत.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
