फलटणमधील आयकर विभागाची कारवाई 5 दिवसांनी संपली: संजीवराजे निंबाळकर म्हणाले – अधिकाऱ्यांनी काहीही जप्त केले नाही, फक्त काही डाटा नेला – Kolhapur News

.

आयकरच्या अधिकाऱ्यांनी छापे टाकल्यापासून संजीवराजेंच्या समर्थनार्थ कार्यकर्त्यांनी चार दिवसांपासून त्यांच्या निवासस्थानाबाहेर ठाण मांडले होते. आयकर विभागाची कारवाई संपल्यानंतर कार्यकर्त्यांनी एकच जल्लोष केलेला पाहायला मिळाला. संजीवराजे नाईक निंबाळकर यांनी विधानसभा निवडणुकीआधी राष्ट्रवादी काँग्रेस शरदचंद्र पवार पक्षात प्रवेश केला होता. आता येत्या काही दिवसांमध्ये अजित पवार यांच्या राष्ट्रवादी काँग्रेसमध्ये प्रवेश करणार होते. त्यापूर्वीच हा छापा टाकण्यात आला आहे. पण या कारवाईतून अधिकाऱ्यांना नेमकं काय मिळालं? असा सवाल उपस्थित होत आहे.

कारवाईनंतर काय म्हणाले संजीवराजे निंबाळकर? संजीवराजे नाईक निंबाळकर यांनी या आयकर छाप्यासंदर्भात प्रतिक्रिया देताना सांगितले की, ही पॉलिटिकल रेड होती किंवा नव्हती हे मला माहीत नाही. मात्र सध्याचा काळ असा आहे की कशाला पॉलिटिकल म्हणायचे? हा अत्यंत अवघड प्रश्न आहे. पाच तारखेपासून ही चौकशी केली. आयटी विभागाच्या अधिकाऱ्यांना जे पाहिजे होते ते त्यांनी पाहिले. बँकेचे लॉकर्स पाहिले. गेले दोन दिवस आम्ही पेपरवर्क करत आहोत. आयकर विभागाच्या अधिकाऱ्यांनी 2 लाख 35 हजाराची कॅश आणि काही दागिने हे जाताना मला परत दिलेले आहेत. तसेच गोविंद मिल्क डेअरी आणि माझ्या घरातून काहीही जप्त केलेले नाही. आमच्या डेअरीचे कामकाज अत्यंत समाधानकारक असल्याचे आयटी अधिकाऱ्यांना दिसून आलेले आहे.

छापेमारी व्यक्तिगत नाही, गोविंद संदर्भात होती ही छापेमारी व्यक्तिगत माझ्यावर नव्हती. गोविंद मिल्क संदर्भात ही कारवाई होती. त्यांना जी चौकशी करायची होती ती त्यांनी केली. आयकर विभागाला या चौकशीतून काहीही सापडले नाही. त्यांनी माझ्याकडून काहीही जप्त केले नाही. काही डेटा नेला आहे. पण जशी इतर ठिकाणी चौकशीत जे सापडते ते सापडले नाही. गोविंदच्या संचालकांची चौकशी झाली आहे. त्यामध्ये त्यांना काहीही आढळले नाही.