‘मराठी अर्थशास्त्र परिषदे’चा सामाजिक मदतीचा हात: मुख्यमंत्री सहायता निधीसाठी 3.62 लाखांचा निधी सुपूर्द, अतिवृष्टी आणि महापूरग्रस्तांना मदत – Chhatrapati Sambhajinagar News

.

राज्यात नुकत्याच झालेल्या अतिवृष्टी आणि महापुरामुळे शेती, घरे, पशुधन, उद्योग आणि पायाभूत सुविधांचे मोठे नुकसान झाले आहे. याची गांभीर्याने दखल घेत मराठी अर्थशास्त्र परिषदेने नुकसानग्रस्तांना मदत करण्याचा निर्णय घेतला. त्यानुसार परिषदेचे पदाधिकारी आणि कार्यकारिणी सदस्यांनी तातडीची बैठक घेऊन समन्वय समिती स्थापन केली. या समितीने परिषदेच्या २१५८ आजीव सदस्यांना आर्थिक मदतीसाठी आवाहन केले.

या आवाहनाला प्रतिसाद देत, २८ सप्टेंबर २०२५ ते १४ ऑक्ट २०२५ या कालावधीत परिषदेच्या २५१ सदस्यांनी तसेच काही इतर मान्यवरांनी एकूण ३,६२,८८० रुपये एवढा निधी जमा केला. हा निधी धनादेश क्रमांक ६३७४९९ (केनरा बँक, अंबड, जि. जालना) द्वारे मुख्यमंत्री सहाय्यता निधीमध्ये जमा करण्यात आला.

मराठी अर्थशास्त्र परिषदेचे कार्य महाराष्ट्रातील अर्थशास्त्राच्या क्षेत्रात महत्त्वपूर्ण आहे. ९ जानेवारी १९७७ रोजी स्थापन झालेली ही परिषद आज महाराष्ट्रासह देशातील व विदेशातील २१५८ आजीव सभासदांची संघटना बनली आहे. मराठी भाषेतून अर्थशास्त्रीय ज्ञान आत्मसात करणाऱ्या या परिषदेद्वारे वर्षभर व्याख्याने, परिसंवाद आणि चर्चासत्रे आयोजित केली जातात.

मागील ४८ वर्षांपासून परिषदेने (केवळ कोरोनाचा एक वर्षाचा अपवाद वगळता) सातत्याने तीन दिवसीय वार्षिक अधिवेशने भरवून धोरण निश्चितीमध्ये महत्त्वाची भूमिका निभावली आहे. तसेच, ‘अर्थसंवाद’ हे त्रैमासिक नियतकालिक प्रकाशित करून राष्ट्रीय आणि राज्य पातळीवरील विविध आर्थिक मुद्दे, सरकारी धोरणे आणि विकास योजना यावर सखोल चर्चा, संशोधन आणि प्रबोधन करण्याचे कार्य अविरतपणे सुरू ठेवले आहे.

परिषदेच्या सर्व आजीव सदस्यांची अशी अपेक्षा आहे की, जमा झालेला हा निधी राज्यातील अतिवृष्टीग्रस्त, पूरग्रस्त आणि नुकसानग्रस्तांना, विशेषतः शैक्षणिक नुकसानग्रस्त विद्यार्थ्यांना मदत म्हणून उपयोगात आणला जावा. परिषदेचे सदस्य डॉ. विलास खंदारे, डॉ. विकास सुकाळे, डॉ. मारोती तेगमपुरे, आणि इतर सदस्यांनी (डॉ. जीवन सोळुंके, डॉ. गणेश गावंडे, डॉ. सुभाष सावंत, डॉ. जितेंद्र तलवारे, डॉ. हनुमंत भोसले, डॉ. राजाराम पाटील, डॉ. धैर्यशील सोळुंके) जिल्हाधिकाऱ्यांकडे हा निधी सुपूर्द करण्याची विनंती केली.